भारत बिहारय् बलि बीत यंकेत्यंम्ह मोडेल बचे जुल

येँ- भारतय् यंकाः नेपाःया छम्ह मोडेलयात बलि बीगु कुतः असफल जूगु दु । मोडल मिसा व प्रहरीया कारणं उगु बलि बीगु कुतः असफल जूगु खः ।
म्हिगः महानगरीय प्रहरी परिसर टेकुइ पत्रकार सम्मेलन यासें प्रहरीं गम्भीर अपराध जुइगुपाखें बचे जूगु खँ धाःगु दु । बिहारया देगलय् च्वंम्ह छम्ह बाबां खुगू फिट उचाई दुम्ह मिसायात बिहारय् बलि बीगु निंतिं नेपाःया मनूतय्त परिचालन याःगु खःसा मिसा हइपिं मनूतय्त आपालं ध्यबा बीगु धकाः छुं ध्यबा बैना कथं बीधुंकूगु खः ।

म्हिगः पत्रकार सम्मेलन यानाः घटनाय् दुथ्याःपिं मू योजनाकार दिलिप पोद्दार सहित न्हय्म्हेसित प्रहरीं सार्वजनिक याःगु खः । प्रहरीं घटनाय् संलग्न जूगु धासें कृष्ण तामाङ, उमेश शाह, दिलकुमारी बुढामगर, उमेश माझी, प्रेमा तामाङ व रञ्जितकुमार चौधरीयात सार्वजनिक याःगु खः ।

मोडलयात नेपाः व भारतया सीमाय् डकुमेन्ट्रीया छायांकन यायेमाःगु धासें आपालं ध्यबाया प्रलोभन क्यंगु खः । मोडलयात प्रलोभन क्यनेगु झ्वलय् अय्ला थ्वँ मत्वंम्ह जुइमाःगु, ला मनम्ह जुइमाःगु व थीमजिउ मजुइमाःगु खँ धायेवं मोडलयात शंका वनाः प्रहरीइ उजुरी तःगु खः । प्रहरीं निवेदन लायेवं उकियात कयाः माःगु अनुसन्धान न्ह्याकूगु खः ।

बिहारया बाबाया माग कथं पोद्दारं उम्ह मोडलयात फँसे यायेगु कथं योजना दयेकूगु खः । उकिया मास्टर माइन्ड व डिजाइनर नं पोद्दार जूगु खँ प्रहरीं धाःगु दु । पोद्दार व बिहारय् च्वंगु देगःया बाबा दथुइ तःक्वः टेलिफोन सम्वाद जूगु खँ प्रहरीं धाःगु दु ।