मुख्यमन्त्री शाक्यं एमाले त्वःती मखुत
येँ – बागमति प्रदेशया मुख्यमन्त्री अष्टलक्ष्मी शाक्यं माधव नेपालया पार्टी वनीगु सम्भावना मदुगु खँ सीदुगु दु । वय्कःया स्वकीय सचिव दिपक महर्जनं मुख्यमन्त्री शाक्य पार्टी विभाजनया पक्षय् मदुगुलिं मुख्यमन्त्री पद हे त्वःतेमाःसां नं आः नेपालया पार्टीइ वनीगु सम्भावना मदुगु खँ ‘नेपालभाषा टाइम्स’ यात कनादिल ।
नेपाल पुचलं थःगु पार्टीइ दुहां मवल धाःसा मुख्यमन्त्री शाक्यलिसे सहकार्य याये मफइगु खँ धायेगु यानाच्वंगु सन्दर्भय् वय्कलं पार्टी अलग जुइधुंकाः सहकार्य याये मखु धायेगु स्वाभाविक खः धासें उकियात उलि गम्भीर रुपं मुख्यमन्त्री शाक्यं मकयाच्वंगु खँ नं वय्कलं कनादिल ।
१०९ सांसद दुगु बागमति प्रदेशय् पार्टी विभाजन न्ह्यः सभामुख सहित ५६ म्ह सांसद एमालेय् दुगु खःसा नेता नेपालं एकीकृत (नेकपा समाजवादी) नामं न्हूगु पार्टी चायेकेवं बागमति प्रदेशय् नं एमाले अल्पमतय् लाःगु दु । एमालेया बागू दर्जन स्वयां अप्वः सांसदपिं एकीकृत समाजवादी पार्टीइ वंगु खः । पार्टी विभाजन लिपा मुख्यमन्त्री शाक्यया पद संकटय् लाःगु दु ।
LEAVE YOUR COMMENTS