लामिछाने विरुद्ध मुद्दा न्ह्याइगु जुल

येँ (नेपालभाषा टाइम्स)-राष्ट्रिय स्वतन्त्र पार्टीया सभापति रवि लामिछाने विरुद्ध नागरिकता दुरुपयोग मुद्दा मन्ह्याकेगु धकाः महान्यायाधिवक्तां याःगु निर्णय विरुद्ध सर्वोच्च अदालतय् रिट दर्ता जूगु दु । निवेदक युवराज पौडेलं आइतवाः सर्वोच्चय् बिउगु निवेदन सोमवाः मुख्य रजिष्ट्रारं दर्ता याःगु खः ।

सर्वोच्च अदालतया प्रवक्ता विमल पौडेलया कथं निवेदनयात कयाः थौं पेशी क्वःछिनातःगु दु । निवेदक पौडेलं लामिछाने विरुद्ध मुद्दा मन्ह्याकेगु धकाः वंगु चैत ६ गते महान्यायाधिवक्तां याःगु निर्णय उत्प्रेषणया आदेशं बदर यासें मुद्दाया निष्पक्ष अनुसन्धान यायेत विपक्षीया नामय् परमादेश जारी यायेमाःगु माग नं याःगु दु ।

रवि लामिछानें म्हिगः हे तिनि चितवनं चुनाव ल्वायेगु धकाः मनोनयन दर्ता यायेधुंकूगु दु । यदि राहदानी प्रकरणय् वय्कःया विरुद्ध मुद्दा न्ह्याकल धाःसा वय्कःया उम्मेदवारी खारेज जुइगु सम्भावना दु ।