बस कुतुं वनाः १५ म्ह सित, चक्काया हावा फुस्के जुयाः दुर्घटना

येँ दोलखाया कालिञ्चोक भगवति दर्शन यानाः लिहां वयाच्वंगु बस म्हिगः सिन्धुपाल्चोकया सुनकोशी गाउँपालिका–७ स्थिति ६ किलोय् दुर्घटना जुयाः झिंन्याम्ह सीगु दु । सीपिं च्याम्ह मिसा, प्यम्ह मिजं व छम्ह मचा जूगु खँ प्रहरीं धाःगु दु।

सीपिं झिंन्याम्ह मध्ये खुम्हेसिया सनाखत जुइधुंकूगु खँ प्रहरीं धाःगु दु । दुर्घटनाय् लानाः सीपिं सुकबहादुर तामाङ, सबिना तामाङ, जुनुमाया तामाङ, मञ्जु तामाङ, महेश तामाङ व चिनु बस्नेत खः ।उकी लानाः झिंन्हय्म्ह घाःपाः जूगु दु । घाःपाः जूपिंत येँ, धौख्यः व सिन्धुपाल्चोकया थीथी अस्पतालय् वासः याकातःगु दु ।
प्रहरीया कथं धौख्यः अस्पतालय् निम्ह, हेम्स अस्पतालय् खुम्ह, केएमीइ छम्ह, सिन्धु सदाबहार अस्पताल खाडीचौर छम्हेसिया वासः जुयाच्वंगु दु । घाःपाः जूपिं झिंन्हय्म्ह मध्ये झिंछम्हेसिया म्हसीका खुले जूगु दु ।

घाःपाः जूपिं आयुषा तामाङ, रञ्जीता तामाङ, धनकाजी तामाङ, हरिमाया तामाङ, दोर्जे तामाङ सागर तामाङ, दिपक तामाङ, नैता तामाङ खः । अथे हे सहचालक विप्लव तामाङ, सागर केसी व न्याला खुला दुम्ह मिसा मचा घाःपाः जूगु खँ प्रहरीं धाःगु दु । बस दुर्घटनाय् लानाः घाःपाः जूपिं आपाःसिया क्वँय् त्वःधूगु खः ।

बस दुर्घटना जुइ न्ह्यः गाडी चालकं बसया हावा फुस्के जूगु धकाः धाःगु खँ सहचालक विप्लव तामाङं धाःगु दु । बस नियन्त्रण याये मफयेवं भीडं कुतुं वंगु खः । दुर्घटना जुइधुंकाः बस क्षतविक्षत अवस्थाय् लूगु खः ।