येँ -रुसय् थौंकन्हय् न्ह्यानाच्वंगु विश्वकप फुटबलय् गुकथंया लिच्वः पिहां वयाच्वंगु खः थुकिं फुटबलया थीथी म्याचय् बाजी तयाः म्हितीपिं मनूतय् ‘कारोवार’ य् तःधंगु उथलपुथल वःगु खँ सीदुगु दु ।
प्रशासनं फुटबलय् बाजी तयाः म्हितेगु ज्यायात प्रतिबन्ध तःसां दुनें दुनें धाःसा स्वनिगः दुने लखौं तका बाजी तयाः म्हितेगु ज्या जुयाच्वंगु दु ।
तर थुगुसी जुयाच्वंगु फुटबलया अप्रत्याशित लिच्वलं यानाः अथे बाजी तयाः म्हिताच्वंपिं दथुइ तःधंगु हे उथल पुथल वःगु खँ धाःगु दु ।
येँया कालिमाटीइ च्वंम्ह छम्ह कासाह्यमिं उकुन्हु जर्मनी बूगु कासां यानाः थः द्वलंद्वःया बाजी बूगु खँ कनादिल । वयां लिपा आः बाजी तयेत हे मनूत ग्यानाच्वंगु दु ।
नांजाःगु देश व नांजाःपिं कासामितय् नामय् लखौं तकाया बाजी तइपिं खेलप्रेमीत दु । तर लिपांगु इलय् नांजाःगु देशत धमाधम बुनाच्वंगु व नांजाःपिं कासामितय्सं गोल नं याये मफुगुलिं उमिगु नामय् बाजी तइपिं आः म्हो जुया वंगु खँ नं सूत्रं धाःगु दु ।
दँय्दसं विश्वकप जुल कि हरेक कासाय् सु त्याइ, सु बुइ, त्याःसा वा बूसा गुलि गोलया अन्तरं बुइ, फलाना कासामिं गोल याइ लाकि याइ मखु आदि आदि धइगु शीर्षय् बाजी तयेगु ज्या जुइ । थुगुसी विश्वकप सुरु जुइ न्ह्यः वीरगञ्जय् बाजी तयाः म्हितेगु लागिं छगू ज्याकू हे चायेकाः ध्यबा मुनेगु ज्या याःगु खःसा उकियात लिपा स्थानीय प्रशासनं बन्द याना बिउगु खः ।
थुगुसी खास यानाः ब्राजिल, अर्जेन्टिना, जर्मनी आदि देशया नामय् बाजी तःपिं मनूत तःधंगु घाटाय् वनाच्वंगु खँ सीदुगु दु । आः नकआउट चरण सुरु मजूतलेफुटबलया बाजी तयेगु खेल नापं तसकं प्रभावित जुइगु अनुमान यानातःगु दु ।
छाय् जुयाच्वन थज्याःगु लिच्वः ?
विश्वकपया थौंकन्हय् जुयाच्वंगु कासाय् थथे अप्रत्याशित लिच्वः पिहां वयाच्वंगु खँयात विश्वन्यंकं हे थीथी कथंया विश्लेषण जुयाच्वंगु दु । खास यानाः तसकं नांजाःपिं ‘पावर हाउस’ धाःगु देशत धमाधम धरासायी जुयाच्वंगु बारे खेल विश्लेषकत थःहे अजू चायाच्वंगु दु । वास्तवय् नांजाःपिं कासामित अप्वः यानाः थःगु क्लबय् हे व्यस्त जुयाच्वनीगु व देशया लागिं म्हितीगु टीम तयार जुइबलय् उकी यक्व ई बी मफइगु लिसें थीथी किसिमया फुटबल म्हिताच्वंपिं कासामित छथाय् च्वनाः हानं मेगु किसिमया कासा म्हितीबलय् तालमेल मिले मजुइगु जुयाः नं उमिसं कासाय् बिचाः याना कथंया लिच्वः पिकाये मफइगु छथ्वःसिया अनुमान वःगु दुसा मेगु पुचलं तःधंगु देशं लीग चरणय् थःगु सम्पूर्ण शक्ति प्रदर्शन मयाःगु कारणं थथे लिच्वः वःगु जुइमाः धकाः नं अनुमान याना हःगु दु ।
LEAVE YOUR COMMENTS