नेता नम्बर २ जुइम्ह सु ले ?
येँ – मेगु वाःनिसें शुरु जुइत्यंगु नेकपा (एमाले) या झिक्वःगु महाधिवेशनं अध्यक्ष पदय् सु वइ धइगु ला स्पष्ट हे जुइधुंकल, उकिं आः कार्यकर्ताया रुची पार्टीया ‘सेकेण्ड म्यान’ सु धइगु खँय् केन्द्रित जूगु दु ।
पार्टी अध्यक्ष केपी ओली सम्भवतः थ्वहे छक्वः जक अध्यक्ष जुयाः मेगु पालंनिसें बिदा जुइगु जूगुलिं वयां लिपा याउँक हे अध्यक्ष जुइ खनीगु जूगुलिं नं एमाले दुने आः निगूगु स्थानया लागिं वरिष्ठ नेतातय् दथुइ खिंचातानी शुरु जूगु दु ।
विज्ञ सूत्रतय्सं धाःकथं थौंकन्हय् एमाले दुने सेकेण्ड म्यानया दर्जाय् च्वने दइगु वरिष्ठ उपाध्यक्ष जुइगु लागिं ईश्वर पोखेरल, सुवास नेम्बाङ व माओवादी त्वःताः वःम्ह नेता रामबहादुर थापां रुची क्यनाच्वंगु दु । यदि थुगुसी ओलीं अध्यक्ष जुइत रुची मक्यंगु जूसा अध्यक्षया उम्मेदवारी बीगु धकाः घोषणा समेत यायेधुंकूम्ह ईश्वर पोखरेल वरिष्ठ उपाध्यक्ष जुइत पूरा हे लगे जुइधुंकूगु सूत्रया दावी दु । संसद दुने ओलीया क्वय् च्वनाः उपनेता कथं ज्या यानादीम्ह सुवास नेम्बाङया कुतः उग्र रुपं मवःसां वय्कलं नं थुकिया लागिं लबिङ धाःसा शुरु यानादीधुंकूगु दु । अथे हे माओवादी त्वःताः एमालेय् वःम्ह रामबहादुर थापां नं वरिष्ठ उपाध्यक्ष जुइगु इच्छा जाहेर यानाच्वंगु खँ धाःगु दु ।
तर थ्व दौडय् थापाया सम्भावना तसकं म्हो जक दुगु सूत्रया दावी दु । थापायात थुकी अप्वः दःसा छुं सम्मान–पूर्ण पद तक दःसा खः, मखुसा नेतृत्वय् वय् खनीगु सम्भावना मदुगु खँ सूत्रं धाःगु दु ।
वरिष्ठ नेता जुइपिं अप्वः दुगु व उकी मध्ये सुं छम्हेसित थम्हं ल्ययेत थाकुइगु खने दुगुलिं अध्यक्ष ओलीं आः थुकी चुनाव हे याकेगु मनःस्थिति दयेकादीगु खँ नं सूत्रं धाःगु दु । वरिष्ठ नेता ल्ययेगु ज्याय् बिष्णु पौडेल, शंकर पोखरेल थेंज्याःपिं ओलीलिसे सतीपिं नेतातय्गु तःधंगु भूमिका दइगु खँ नं धयाहःगु दु ।
पार्टीया पदाधिकारीत चुनाव यानाः ल्ययेगु खँ पिहां वयेवं माओवादी त्वःताः एमालेय् वयाच्वंपिं नेतात चिन्तित जूगु दु । यदि चुनाव यात धाःसा थःपिं मध्ये सुं हे त्याइगु सम्भावना मदुगु खँ माओवादी पृष्ठभूमिया नेतातय्सं धयाहःगु दु । आः पार्टी दुने उमिगु स्थान नेतृत्वं गथे तय याइ अथे हे जक जुइगु खँ धायेगु याना हःगु दु ।
LEAVE YOUR COMMENTS