भूमि विधेयकयात कयाः शनिवाः बैठक

येँ – भूमि विधेयकयात कयाः वइगु शनिवाः वृहत अन्तक्र्रिया ज्याझ्वः जुइगु जूगु दु । सतक विस्तार पीडित संघर्ष समितिया ग्वसालय् उगु ज्याझ्वः जुइत्यंगु खँ संघर्ष समितिया अध्यक्ष सुमन साय्मि ‘नेपालभाषा टाइम्स’ यात कनादीगु दु । सरकारं भूमि विधेयक व जग्गा प्राप्ति ऐनया आठौं संशोधान ड्राफ यायेगु ज्या क्वचायेकाः तयेधुंकूलिं उकियात कयाः सहलह ब्याकेमाःगु खँ भाजु साय्मि कनादीगु दु ।

आःया सरकारं हयेत्यंगु जग्गा प्रांत्पि ऐन पारित जुल धाःसा स्वनिगःया आपालं जनताया सतक सिथय् च्वंगु छेँ थुनेत अपुइगु जूगुलिं उगु विधेयकयात कयाः व्यापाक सहलह यायेगु तयारी जुयाच्वंगु जानकारी नं वय्कलं बियादीगु दु ।

सहलह ज्याझ्वलय् आदिवासी जनजाति वकिलतय् संस्था लाहुर्निपया महासचिव शंकर लिम्बुया लिसें मेपिं अधिवक्तापिंसं भुमि विधेयक व जग्गा प्राप्ति ऐनयात कयाः ध्वाथुइकेगु ज्या जुइगु जानकारी नं भाजु साय्मि बियादीगु दु । सरकारं खुला न्ह्यः भूमि विधेयक लित काःसां नं आः हाकनं उगु हे विधेयक गथे खः अथे हये फइगु सम्भावना अप्वया वंगु खँ सम्बन्धित विज्ञपिंसं धाःगु दु ।