ओलीयात सत्ता, दाहालयात पार्टी

पार्टीया सहमति कार्यान्वयन यायेत राष्ट्रपति साक्षी

येँ – सत्तारुढ पार्टी नेकपा दुने निम्ह अध्यक्षपिं केपी ओली व पुष्पकमल दाहालया जिम्मे–वारी स्पष्ट याःगु दु । पार्टीइ वय्कःपिं निम्हं अध्यक्ष कायम हे जुयाच्वंसां प्रधानमन्त्री ओलीया जिम्मेवारी सरकार सञ्चालन व दाहालया जिम्मेवारी पार्टी सञ्चालन धकाः स्पष्ट याःगु दु ।

अध्यक्ष दाहालं ताःई न्ह्यवंनिसें थःत कि पार्टीया जिम्मा माल कि सरकारया जिम्मेवारी माल धकाः माग याना वयाच्वंगु खः । म्हिगः च्वंगु पार्टीया सचिवालय बैठकं थ्व निर्णय याःगु खः । पार्टीइ ओलीयात १ नम्बरय् लाकाः दयेकातःगु वरियताक्रम नं कायम हे जुइ । बैठकया अध्यक्षता निम्हेस्यां याःसां सञ्चालन धाःसा अध्यक्ष दाहालं यानादी ।

दाहालं थ्व संसद अवधि तक ओलीयात चीकाः प्रधानमन्त्री जुइमाल धकाः दावी धाःसा यानादी मखु । थ्व संसद अवधिभर ओली हे प्रधानमन्त्री जुइगु खँय् नं सहमति जूगु दु ।निम्हेसित निगू हे जिम्मेवारी बिउगु खःसां पार्टी सम्बन्धी ज्याखँ व सरकार सम्बन्धी ज्याखँया निर्णय धाःसा निम्हेसिया दथुइ सहलह यानाः जक याइ धइगु खँय् नं सहमति जूगु दु ।

सूत्रतय्सं धाः कथं निम्हेसिया दथुइ थ्व सहमति कायम यायेत राष्ट्रपति विद्यादेवी भण्डारीयात साक्षी तःगु खः । निम्ह अध्यक्षया दथुइ राष्ट्रपति भण्डारीयात साक्षी तयाः थ्व सहमति कायम याःगु खः । प्रधानमन्त्री ओलीं वासः याकेत थः विदेश वनेगु इलय् उपप्रधानमन्त्री ईश्वर पोखरेलयात कार्यवाहक बीगु मनस्थिति नं दयेकादीगु खँ सीदुगु दु ।

वय्कलं थ्व जिम्मेवारी महासचिव बिष्णु पौडेलयात बियाथकेगु बिचाः यानादीगु खः । तर छखे पौडेलं थः सरकारय् वने मखु धकाः स्पष्टं धयादीगु व मेखे आः सरकार कःघायेगु ज्या पौडेलं याये फइ मखु धकाः राष्ट्रपति भण्डारीं हे सुझाव बियादीगु कारणं नं प्रम ओलीं पोखरेलयात कार्यभार बियाथकेत्यंगु खँ नं सूत्रं धाःगु दु ।

सम्बन्धित बुखँ

LEAVE YOUR COMMENTS