चित्रया लिधंसाय् बुद्धया वृत्तचित्र व संकिपा दयेकीगु

येँ –  शान्ति नायक भगवान गौतम बुद्धया चिकं रंगया चित्रया आधारय् वृत्तचित्र व संकिपा निर्माण याइगु जूगु दु । उगु संकिपा चीनया छगू कम्पनीं निर्माण यायेत्यंगु खः । चीनया मुन भच्र्यु कल्चर मिडिया कम्पनीं भगवान गौतम बुद्धया चिकंरंगया चित्र दयेकाः उकिया हे बाखंया लिधंसाय् बृत्तचित्र व संकिपा निर्माण यायेत्यंगु खः ।

छुं दिं न्ह्यः नेपाः भ्रमणय् वःगु चिनिया कम्पनीया प्रतिनिधिं संकिपा निर्माणया बारे जानकारी बिउगु खः । थन छगू पत्रकार सम्मेलन यासे कम्पनीया कार्यकारी प्रमुख हु जिझोङं नेपाः व चीन निगू देय्या दथुइ ऐतिहासिक सम्बन्ध पिज्वइकथं संकिपा निर्माण यायेत्यनागु जानकारी बियादिल ।

वृत्तचित्रया निंतिं चीनया कलाकार वाङ मिङं लुम्बिनी चिकंरंगया चित्र दयेकादीगु व वयां लिपा मार्च महिनानिसें छायांकन शुरु यायेगु जानकारी नं वय्कलं बियादिल । ‘नेपाः व चीन निगू देय्या सांस्कृतिक सम्बन्धयात तिबः बीगु ज्याय् ग्वाहालि जुइकथं चित्र दयेकेगु जुइ’ कार्यकारी प्रमुख जिझोङं धयादिल, ‘निपाः किपा दयेकेगु जुइ चित्र दयेकेधुंकाः उगु किपा नेपाल सरकारयात उपहारकथं लःल्हायेगु जुइ ।’

राजकुमार सिद्धार्थ गौतमं बुद्धत्व प्राप्त याये न्ह्यःया शारीरिक बनावट पिज्वइकथंया वास्तविक चिकंरंगया चित्र च्वयेगु प्रस्तुत यायेगु कम्पनीं जानकारी बिउगु दु । संकिपा निर्माण यायेधुंकाः उकियात नेपाः व चीनलिसें विश्वया मेमेगु देय् नं प्रदर्शन यायेगु कम्पनीं न्ह्यथंगु दु ।

वृत्तचित्र निर्माण यानाः प्रदर्शनय् वयेधुंकाः कलाकार वाङ मिङं दयेकूगु चिकंरंगया चित्र खुया यंकूगु विषयया लिधंसाय् संकिपा दयेकेगु योजना कम्पनीं दयेकूगु दुसा उगु संकिपा नेपाःपाखें रेश मरहठ्ठायात मुख्य भूमिकाय् अनुबन्ध यानागु जानकारी नं कार्यकारी प्रमुख हुं बियादिल ।

‘रेशयात संकिपाया मुख्य भूमिकाय् म्हितकेगु सहमति जुइधुंकूगु दु’, हुं धयादिल, ‘मेगु महिनाय् बेइजिङय् औपचारिक सम्झौता जुइ ।’
संकिपाय् मुख्य भूमिकाया निंतिं छनोट जुयादीम्ह रेशं संकिपाया निंतिं छनोट जुइगु नेपाःव नेपाःमिया निंतिं तःधंगु सम्मान व गौरवया विषय खः धासें थःत नेपाःयात म्हसीकेगु ज्याय् छनोट जूगुलिं थःत गर्व जूगु धयादिल ।

 

सम्बन्धित बुखँ

LEAVE YOUR COMMENTS