सन्दीपविरुद्ध प्रहरी अनुसन्धान शुरु

येँ (नेपालभाषा टाइम्स)- नेपाः राष्ट्रिय क्रिकेट टिमया कप्तान सन्दीप लामिछानेविरुद्ध अनुसन्धान शुरु जूगु प्रहरीं जानकारी बिउगु दु । १७ दँ दुम्ह छम्ह मिसामचां सन्दीपविरुद्ध बलात्कारया द्वपं बियाः उजुरी तयेवं प्रहरीं अनुसन्धान शुरु याःगु खः । मिसाया अभिभावकतय्सं मंगलवाः महनगरीय प्रहरी वृत्त गौशालाय् जाहेरी बिउगु खः ।

प्रहरीं बिउगु जानकारी कथं जोहरीइ लामिछानें उम्ह मिसायात भदौ ५ गते येँ व ख्वपया थीथी थासय् चाःहिकेयंकाः बहनी येँया गौशालाय् च्वंगु छगू होटेलय् यंकाः बलात्कार याःगु न्ह्यथनातःगु दु । थ्व जाहेरी वयेवं पीडितया स्वास्थ्य परीक्षण यायेधुंकूगु दु । अथेहे मिसामचां धाःकथं उपिं चाःहिउ वंगु थाय्, बलात्कार जूगु होटलया सिसिटिभि फुटेज मुंकेगु सुरु यायेधुंकूगु दुसा होटलया कर्मचारीतय्के नं न्यनेकने याःगु दु ।

थ्वहे दथुइ नेपाल क्रिकेट संघ क्यानं प्रहरीयात अनुसन्धानया निंतिं ग्वाहालि यायेगु धाःगु दु । थ्व घटना जूगु छन्हु लिपा हे लामिछाने केन्याय् टि–२० सिरिज म्हितेत वंगु खःसा आः लामिछाने क्यारेवियन प्रिमियर म्हितेत वेस्टइन्डिज वनाच्वंगु दु । वयालिसें केन्या वंगु टिम धाःसा नेपाः लिहां वयेधुंकूगु दु ।