‘वइगु दँय् बांलाःगु खबर न्यनेदइ’

‘मुसुमुसु न्हिलाः छं दः हायेकः वयेमते’
ख्यालि–न्हिलां जाःगु थुगु म्युजिक भिडियोय् छम्ह न्यासिचाःम्ह मिसाया भूमिका खनेदुम्ह मय्जु खः– रजनी खड्गी । रजनीया मू छेँ ख्वपय् खःसां व धाःसा अबु जगतबहादुर खड्गी व मां हिराशोभाया कोखं याकःम्ह्याय् जुयाः येँया बुरांख्यलय् बूम्ह खः ।

क्रियटिभ प्रोडक्सनं ग्वसाः ग्वःगु ‘बांलाःमय्जु’ इभेन्टय् सकेन्ड रनरअप जुइत ताःलाःम्ह रजनीयात इमेज च्यानलय् प्रसारण जुइगु समय्बजीया निर्देशक सुरेन्द्र मानन्धरं वं ‘बांलाः मय्जु’ ज्याझ्वलय् बांलाक नेवाः भाय् ल्हाःगु खनाः ‘समय्बजी’ ज्याझ्वलय् कलाकार नापं भिजे कथं प्रवेश याकूगु खः । उबलय् निसें थौंतक रजनीं कलाकारीता क्षेत्रय् लिफः स्वयेमाःगु मदुनि ।

कलाकार जुइत इच्छा जक दयां मगाः, तालिम लिसें छेँजःपिनिगु ग्वाहालि नं दयेमाः धाइम्ह रजनीं पेज थ्रीया वेस्ट फिमेल अवार्ड नं त्याके धुंकूगु दु ।कलाकारिताय् मजूगु खःसा एयरहोस्टय् जुइगु बिचाः तःम्ह रजनीं बासु शाहीया ‘ब्या याये म्हाः’ धाःगु म्युजिक भिडियोलय् न्हापांखुसी मोडलिंग याःगु खः ।

थौंतकया दुने वं थ्यंमथ्यं ३५ पु म्येँया म्युजिक भिडियो, गुंगू प्याखं व खुगू नेपाली भाय्या म्युजिक भिडियो याये धुंकूगु दु । कलाकारीता ख्यलय् वयाः पारिश्रमिक गुलि गाः अले थुगु क्षेत्रय् लगे जुयाः म्वायेगु आधार दु ला धइगु न्ह्यसलय् रजनीया धापु थुकथं दु– ‘हरेक चिज ध्यबा हे जक मखु, जि थ्व क्षेत्रय् वयाः नेवाः क्षेत्रय् छुं याये दत धइगु खँय् गर्व ताः ।

उकिया नापनापं नेपालभाषा बांलाक स्यने खन, नेवाः संस्कृति सयेकेदत थःगु पहिचान क्यने फत ।’ ‘झिदँ न्ह्यः थुगु क्षेत्रय् पलाः तःगू इलय् पारिश्रमिक मवः, तालिम कथं जक काइगु बरु अःखःबतं थःम्ह हे ध्यबा तयेमाःगु अवस्थां तक वःगु, तर आः अज्याःगु समस्या मदु पारिश्रमिक ला वः तर सन्तुष्ट कथं मजूनि’ वं धाःगु दु ।

डाइरेक्टर, मेकअपम्यानयात धाःसा ध्यबा बिउ तर कलाकारतय्त धाःसा ध्यबा मदुगु खँय् धाःसा रजनीया दुःख ताः । थुगु क्षेत्रय् लगे जुयाः आःया अवस्थाय् म्वायेगु आधार धाःसा मदुनि धाइम्ह रजनीया लिपा थुगु क्षेत्र विकास याना वनेफत धाःसा अवश्य नं म्वाये फइगु आधार दइ धयागु विश्वास दु । ‘थुकिया निंतिं कलाकारत नं छप्पँ जुइमाः’ वय्कःया बिचाः दु ।

आपाः धइथें नेपालभाषाया संकिपा व म्युजिक भिडियो स्तरिय खनेमदु, उकियात सुधार यायेत छु यायेमा धइगु न्ह्यसलय् रजनीं थःगु बिचाः थुकथं तल, ‘संकिपा कामचलाउ जक दयेकां मजिउ, दर्शकतय्त माःगु छु खः व क्यने फयेकेमाः, स्तरिय जुइमाः । संकिपा व म्युजिक भिडियोय् दुगु कमीकमजोरीया बारे सुझाव कयाः स्यंगु भिंकेगु स्वयेमाः, विदेशय् तकं थःगु म्हसीका वनीकथं दयेकेमाः ।

लिसेलिसें प्रचार प्रसार नं जुइमाः । प्रचार प्रसार हे मंत धाःसा सुनां नं सी मखु उकिं मुख्यतः प्रचार प्रसार हे ध्यान बीमाः ।’ थौंकन्हय् इमेज च्यानलया समय्बजी, रामकृष्ण खड्गीया कर्म संकिपा व चिहाकः संकिपाय् व्यस्त जुयाच्वंम्ह रजनीयात नेपालभाषाया कलाकारिता क्षेत्रया आपाः धइथें कलाकारपिनिगु इहिपा जुइ धुंकूगु तर रजनीया धाःसा मजूनि नि धइगु न्ह्यसलय् मुसुमुसु न्हिलाः धाल, ‘सायद आः वइगु दँय् छिं बांलाःगु खबर न्यने दइ ।’
न्ह्यब्वःम्ह ः निलः साय्मि

सम्बन्धित बुखँ

LEAVE YOUR COMMENTS