रामग्राम स्तुपाया जियोफिजिक्स सर्भे क्वचाल

येँ – पश्चिम नवलपरासीया रामग्राम स्तुपा क्षेत्रय् न्ह्यानाच्वंगु जियोफिजिक्स सर्भे (भू भौतिक सर्वेक्षण) क्वचाःगु दु । बेलायतया जियोफिजिक्स विज्ञतय् संलग्नताय् पश्चिम नवलपरासीया भगवान बुद्धया अस्थिधातु दुगु थाय् रामग्रामय् उगु सर्भे याःगु खः । प्यक्वःखुसी जूगु उगु सर्भे युनेस्कोपाखें फ्रान्सया ओरियन्टल कल्चरल हेरिटेज साइट प्रोटेक्सन, एलायन्सया आर्थिक ग्वाहालिं जूगु खः ।

नेपाल सरकारया पुरातत्व विभाग, लुम्बिनी विकास कोष, बेलायतया दुरह्याम विश्वविद्यालयया विज्ञतय् पुचलं वंगु छवाः न्ह्यवंनिसें उगु थासय् बृहत रुपं अध्ययन याःगु खः । रामग्राम स्तुपा विश्वसम्पदाया धलखय् दुथ्याकेगु प्रक्रियाय् वनाच्वंगु सम्पदा क्षेत्र नं खः । वंगु कात्तिक २१ गतेनिसें शुरु जूगु सर्भे कात्तिक २७ गते सिधःगु जानकारी पुरातत्व विभागया पुरातत्वविद् विष्णु पाठकं बियादिल ।

वय्कलं कनादीकथं निम्ह विदेशीलिसें स्वम्ह विज्ञतय् पुचलं स्तुपा क्षेत्र व जःखःया प्यखेरं ५०० मिटर क्षेत्रफलय् स्वंगूकथंया अध्ययन याःगु खः । स्तुपा क्षेत्रया जमिनया सतहं क्वय् च्वंगु संरचना अध्ययन यानाः विज्ञतय् पुचः तिलौराकोट लिहां वंगु दुसा उगु अध्ययनया विस्तृत प्रतिवेदन वइगु जनवरी महिनाय् सार्वजनिक याइगु जूगु दु ।

अध्ययन याःगु दक्वं थासय् अतिकं महत्वूर्ण प्रमाण दुगु संकेत खाने दुगु वय्कलं धयादीगु दुसा अध्ययन पुचलं स्तुपाया दक्षिणपाखे झाः व खाली जमिनया क्वय् पःखाः खने दुगु न्ह्यथंगु दु । मेमेगु क्षेत्रय् खनेदुगु संरचनाया विवरण धाःसा विस्तृत प्रतिवेदन प्राप्त जुइधुंकाः जक धाये फइगु नं पाठकं धयादिल ।