रुपज्योति ज्वंगु विरुद्ध थौं नं प्रदर्शन

येँ – उद्योगपति लिसें नांजाःम्ह व्यवसायी रुपज्योतियात ज्वंगु विरोधय् थौं नेपाल उद्योग वाणिज्य महासंघं चरणवद्ध आन्दोलनया ज्याझ्वः कथं थनया जुद्ध शालिकं विरोध प्रदर्शन याइगु जूगु दु । उद्योग वाणिज्य महासंघया येँ शाखां म्हिगः छगू प्रेस विज्ञप्ति जारी यासें थुकिया जानकारी बिउगु खः ।

प्रेस विज्ञप्तिइ अर्बौं तकाया लगानी यानाः देय्यात करोडौं तका बराबरया कर पुलाच्वंपिं व्यवसायीतय् परिवारयात व्यवसायया झ्वलय् जूगु विवादयात ज्यंकेगु थीथी लँपु दयेक दयेकं ज्वनेगु ज्या याःगुलिं निजी क्षेत्रया व्यावसायिक वातावरणय् तकं नकारात्मक लिच्वः लाइ धयातःगु दु ।

थ्वहे झ्वलय् धर्मोदय सभापाखें नं छगू वक्तव्य जारी यासें प्रतिष्ठित व्यवसायी रुपज्योतियात ज्वंगुया विरोध याःगु दु । सभां रुपज्योतियात पूर्वाग्रही जुयाः ज्वंगु धासें तुरुन्त त्वःतेत नं माग याःगु दु ।

उकथं हे तबः (ताम्राकार) समाजं नं छगू वक्तव्य बिसें बिना पूर्व सुचं प्रतिष्ठित व्यवसायी रुपज्योति कंसाकार लिसें वय्कःया म्ह्याय्यात ज्वंगु खँय् आपत्ति प्वंकूगु दु । वय्कःपिंत अपहरणया शैलीं ज्वनाः कुने यंकूगुलिं थःपिं दुःखित जुया धासें वय्कःपिंत तुरुन्त हे त्वःतेत नं माग यानातःगु दु ।