ने. सं. ११४४ कौलाथ्व चौथी -

निमेश कपालीं त्याकल अनलाइन तबला कासा

यल – वरिष्ठ तबलावादक रविनलाल श्रेष्ठया लुमन्तिइ जयश्री संगीत समाजं ग्वसाः ग्वःगु तबला वादन धेंधेंबल्लाः निमेश कपालीं त्याकूगु दु । प्रतियोगिताया दकलय् बांलाःम्ह तबला वादक कपालीं अमेरिकाया टेक्ससय् च्वंगु School of Indian Percussion and Music पाखें लच्छिया अनलाईन कोर्ष छात्रवृत्ति व झिद्वः तका त्याकादिल ।

अनलाईन तबला वादनया ग्रायन्ड फिनालेय् ल्यू लाःम्ह अजय चौधरीं न्हय्द्वः तका, लियांल्यू लाःम्ह अभय महर्जनं न्याद्वः तका व दकलय् अप्वः भ्यूजया सिरपाः त्याकादीम्ह उजन डंगोलं न्याद्वः तका दां सिरपाः त्याकादीगु खः । नापं रुबि श्रेष्ठ लाखें हःपाः सिरपा त्याकादीगु खःसा उत्कृष्ट १० म्हय् लाःपिं सत्येन्द्र भट्टराई, सपत शाक्य, निर्जल डंगोल, रोजमान महर्जन, राहुल शाक्य, आर्जल डंगोलं गुरु रविनलाल श्रेष्ठया जयश्री तालया सिडी व सफू दोहलपा कयादिल ।

प्रतियोगिताया न्हापांगु चरणय् स्वंगू मिनेटया तबला वादनया भिडियोया निंतिं आव्हान जूगु खः, गुकी २५ म्ह तबला वादकपिंसं भिडियो दुथ्याकाःदीगु खःसा थुगु हे पुचलं असारया न्हापांगु वालय् उत्कृष्ट १० म्ह ल्यज्या जूगु खः । न्हाप, ल्यू व लियांल्यू लाःपिं तबला वादकया ल्यज्या अमेरिकाय् च्वनाच्वनादीम्ह प्रसिद्ध भारतीय तबला वादक गौरीशंकर कर्माकरं यानादीगु खः ।

प्रतिस्पर्धाया लिच्वः निष्पक्ष जुइमा धकाः थथे यानागु ग्वसाः खलकं धाःगु दु । बांलाःपिं तबला बादक मालेगु हे थुगु ग्वसाःया तातुना जूगु खँ कँसे खुल्ला रुपं आयोजना यायेगु तातुना दुगु थुगु ग्वसाः कोरोना जोखिम व लकडाउनया हुनिं अनलाईनय् हिलागु खँ नं ग्वसाः खलकं कंगु दु ।

झिदँ न्ह्यः प्रसिद्ध तबलावादक अले गुरु रविनलाल श्रेष्ठया समर्पणय् वय्कःया शिष्यपिंसं जयश्री संगीत समाज स्वंगु खः । गुरु श्रेष्ठं रचना याःगु जयश्री तालया हे नामय् थुगु समाजया नां तयागु नं ग्वसाः खलकं जानकारी ब्यूगु दु ।