भारतलिसे भूमि हिलाबुलाया प्रस्ताव

येँ (नेपालभाषा टाइम्स)- प्रधानमन्त्री पुष्पकमल दाहालया भारत भ्रमण लिपा नेपाःया सीमा सम्बन्धी विवादं न्हूगु मोड काःगु दु । खास यानाः भारतं कब्जा यानाः कयातःगु कालापानी, लिपुलेक व लिम्पियाधुराया भूमिया पलेसा नेपालं बंगलादेश तक वने फइ कथंया भूमि नेपाः– यात बिल धाःसा थ्व समस्या समाधान याये जी धकाः प्रम दाहालं भारतय् धया वःगु खँयात कयाः थन विवाद जूगु खः ।

संसारय् सीमा विवादयात थथे भूमि हिलाबुला यानाः नं समाधान यायेगु चलन दु कथं प्रधानमन्त्री दाहालं भारतलिसे अज्याःगु खँ ल्हाना वःगु खः । तर नेपालय् प्रमुख प्रतिपक्षी एमालेया नेतातय्सं धाःसा प्रम दाहालया उगु पलाःया विरोध याना हःगु दु ।

थ्वहे झ्वलय् सीमाविद् बुद्धिनारायण श्रेष्ठं नं यदि भारतं बंगलादेश तक स्वाइगु भूमि नेपाःयात बीगु जुल धाःसा कालापानीया भूमि हिलाबुला याःसां जिउ धइगु धापू न्ह्यःने तयादीगु दु । थौंकन्हय् भारतं कालापानीया गुगु भूमि कब्जा यानातःगु खः, उगु भूमि नेपाःयात लित हे बिउसां नेपालं उकियात उपयोग याये मफइगु जूगुलिं नेपालं नं उकिया पलेसा मेगु भूमि काये फुसा जिउ धइगु धापू वय्कलं तयादीगु खः ।

भारतं छुं दँ न्ह्यः तिनि बंगलादेशलिसे नं थीथी टापू हे हिलाबुला यानाः सीमा विवाद समाधान याःगु न्ह्यःने तसें श्रेष्ठं धयादीगु दु– थुकिया लागिं नेपाःया संविधानय् छुं भचा संशोधन याये माली । तर आःया लागिं थ्व नं छगू बांलाःगु उपाय जुइफु ।