डा. रुपज्योतियात ज्वंगु विरुद्ध सतकय् जन प्रदर्शन

येँ – नांजाम्ह उद्योगपति व्यापारी डा. रुपज्योतियात अदालतं थप न्यान्हु कुनेगु निंतिं प्रहरीयात अनुमति बिउगु दु । अदालतय् बयान बीगु झ्वलय् डा. रुपज्योतिं थः व थःगु छेँजःयात बदनाम यायेगु निंतिं राज्य हे लगे जुयाच्वंगु द्वपं बियादिसें थम्हं जाहेरी लाये स्वयां न्ह्यः हे ध्यबा पुलेधुनागु जानकारी अदालतयात याकादीगु दु ।

डा. रुपज्योतियात बिगेन्द्रकृष्ण मल्लं १ करोड २६ लाख तका ठगे याःगु धासें जाहेरी बिउगु खःसा उगु जाहेरीया आधारय् सिंगापुरं लिहां वयाच्वंगु इलय् वय्कः लिसें म्ह्याय् सुरुची कंसाकारयात त्रिभुवन अन्तर्राष्ट्रिय विमानस्थलं हे ज्वंगु खः । म्हिगः अदालतय् डा. रुपज्योति थम्हं हे बहस यानादीगु खः ।

वय्कलं अदालतय् बयान बीगु झ्वलय् मल्लयात शम्भु फुँयाल मार्फत १ करोड २६ लाख तका बीधुनागु धासें जाहेरी स्वयां न्ह्यः ध्यबा पुले धुनागु जिकिर यानादीगु खः । वय्कःया कथं मल्लं २०७५ साल मंसिर १६ गते थः व छेँजःया विरुद्ध मुद्दा दर्ता याःगु खःसा व स्वयां न्ह्यः थम्हं ध्यबा पुले धुनागु जिकिर यानादीगु खः ।

लिसे वय्कलं थम्हं अदालतय् ध्यबा बुझे यायेगु झ्वलय् कोर्ट फी तकं थम्हं पुलागु जिकिर यानादिसें उकिया प्रमाण तकं थःके दुगु दावी यानादिल । वय्कलं जिकिर यायेगु झ्वलय् धयादी, ‘उजुर याये स्वयां न्ह्यः हे अदालतय् ध्यबा जम्मा जुइधुंकाः नं ध्यबा मकासे मुद्दा तयेगु व उकिया हे लिधंसाय् हिरासतय् तयेगु ज्यां फँसे यायेगु नियत खनेदु ।’

न्यायधीशया न्ह्यःने बयान बीगु झ्वलय् डा. रुपज्योति गुगु कम्पनीया नां धाःगु दु, उकिया थः सञ्चालक मखु धासें थः जक मखु विदेशय् च्वनाच्वंम्ह म्ह्याय्या लिसें काय सौरभ ज्योति व छेँय् नं गुबसं पिहां मवःम्ह केहेँया नामय् नं जाहेरी लाःगु खँ कनादिल । थ्वहे झ्वलय् उदाय समाजया ग्वसालय् म्हिगः डा. रुपज्योतियात ज्वंगु विरोधय् शान्तिपूर्ण जुलुस पिकाःगु दु ।

असनं न्ह्याःगु जुलुस रत्नपार्क, त्रिपुरेश्वर जुयाः माइतीघर मण्डलाय् थ्यंकाः धर्ना बिउगु खः । व्यक्तिगत रिसइबी तये दइमखु, प्रतिशोध व बदनियतपूर्ण ढंगं बिउगु द्वपं खारेज यायेमा, डा. रुपज्योतियात बिना सर्त त्वःतेमाःगु माग उदाय समाजं याःगु खः । उकथं हे डा. रुपज्योतियात ज्वंगु खँय् देय्या उद्योग व्यवसायीतय्सं नं विरोध याःगु दु । उद्योग वाणिज्य महासंघं वय्कःयात ज्वनेगु ज्या याःगुलिं उद्योग व्यवसायीत आतंकित जुयाच्वंगु दु धासें उकियात कयाः सरकारया विरोध याःगु दु ।

 

सम्बन्धित बुखँ

LEAVE YOUR COMMENTS