मरुसतःयात मेगु ५ करोड

येँ – तःभुखाचं दुना वंगु मरुसतः पुन–र्निर्माणया लागिं यँे महानगरपालिकां मेगु ५ करोड तका बिउगु दु । म्हिगः छगू ज्याझ्वःया दथुइ येँ मनपाया मेयर विद्यासुन्दर शाक्यं काष्ठमण्डप पुननिर्माण समितिया नायः लिसें बागमति प्रदेशया सांसद राजेश शाक्ययात ५ करोड तकाया चेक लःल्हानादीगु खः । थ्व स्वयां न्ह्यः मनपां ५ करोड ५० लाख तका बीधुंकूगु दु ।

चेक लःल्हाना कासें समितिया नायः सांसद शाक्यं मरुसतःया पुनर्निर्माण ज्या ५५ प्रतिशत क्वचाये धुंकूगु खँ कनादिल । छुं ई न्ह्यः मरुसतः दयेकेगु लागिं सिँया अभाव जूगु खःसां आः सिँ हयेगु लागिं छुं समस्या मदुगु जानकारी बियादिल । वय्कलं धयादिल, ‘आः छुं ई लिपा हे मरुसतलं न्हूगु स्वरुप काइगु निश्चित दु ।’

मरुसतःया लागिं आवश्यक सिँ मदयाः सांसद शाक्य लगायतया पुचलं देय्या थीथी जंगलय् वनाः सिँ मालेगु ज्या याःगु खः ।
ज्याझ्वलय् न्ववासें येँ मनपाया मेयर विद्यासुन्दर शाक्यं मरुसतः थःपिनिगु हे कार्यकालय् उलेज्या जुइगु खँय् थः ढुक्क जुयागु दु धयादिल । लिसें वय्कलं तःभुखाचं दुना वंगु फुक्क हे सांस्कृतिक सम्पदा थःपिनिगु हे कार्यकालय् दयेका वनेगु खँ न्ह्यथँसें गनं नं सम्पदा पुनर्निर्माण यायेमाःगु दःसा खबर यानादीत इनाप यानादिल ।

संघीय सांसद कृष्णगोपाल श्रेष्ठं झीगु सम्पदा झीसं हे दयेके धइगु ताः तयाः महानगरपालिकां सुयां न्ह्यःने ल्हाः मफसे मरुसतः दयेकाच्वंगु खँ कनादिल । २३ वडाया अध्यक्ष मचाराजा महर्जनं लसकुस यासें न्ह्याकूगु ज्याझ्वलय् उपमेयर हरिप्रभा श्रेष्ठ खड्गीं नं न्ववानादीगु खः ।