ने. सं. ११४४ कछलागा द्वादशी -

नेवाः नखः न्यूयोर्कया मंकाः म्हपुजा

येँ – अमेरिकाया न्यूयोर्क सहरय् च्वंपिं नेवाःतय् संगठन नेवाः नखः न्यूयोर्कया ग्वसालय् न्हयक्वःगु मंकाः म्हपुजा ज्याझ्वः जुल । वंगु ने.सं. ११४० कछलाथ्व पारु, सोमवाःकुन्हु जूगु मंकाः म्हपुजा ज्याझ्वलय् संस्थापाखें पिथंगु नेपाल संवत् ११४० न्हूदँया नगुमाया नं पितब्वज्या याःगु खः ।

नेवाःलिसें गैर नेवाः, थीथी संघसंस्थाया प्रतिनिधि व दुजःपिं नापं विदेशी पाहांपिंसं नं ब्वति काःगु मंकाः म्हपुजाय् ज्याझ्वलय् संस्थाया मूछ्याञ्जे डा. नरेशमान शाक्यं पाहांपिंत लसकुस यासे भिंतुना देछानादीगु खःसा पाहांपिनिगु म्हसीका नं न्ह्यब्वयादीगु खः ।

न्यूयोर्क सिटीया ज्याक्सन हाइटय् च्वंगु शेर्पा किदुग हलय् जूगु ज्याझ्वलय् संस्थाया न्हापांम्ह न्वकु महेन्द्रवीर वज्राचार्यं लसकुस यासें संस्थाया म्हसीका बियादीगु खः । संस्थाया सल्लाहकार अजयमान छोचुं नं म्हपुजाया महत्व कनादिसें मन्त्रविधि ब्वनाः विधिपूर्वक म्हपुजा याःगु खः ।

ज्याझ्वःया मूपाहां नेपाल कन्सुलेटया महावाणिज्य दूत पुष्पराज भट्टराईं नेपाल संवत् ११४० न्हूदँया लसताय् संस्थां पिथंगु नगुमाया पितब्वज्या यानादिसें नेपाल संवत्या महत्व बारे नुगःखँ तयादिल । संस्थापाखें स्वक्वःखुसी थुकथं नगुमा पिथंगु खः ।

न्यूयोर्क सिटीया मेयर बिल दे बलाजियोनं न्हूदँलिसें म्हपुजायात कयाः छ्वया हयादीगु भिंतुना सन्देश मूछ्याञ्जे डा. शाक्यं ब्वनाः न्यंकादीगु खः । संस्थाया नायः विष्णुमान प्रधानं न्हूदँया लसताय् सकसितं भिंतुना देछानादिसें मंकाः म्हपुजाय् ब्वति कयादीपिं, ज्याझ्वः ताःलाकेत ग्वाहालि यानादीपिं व प्रायोजन यानादीगु संस्थायात सुभाय् देछानादिल ।

म्हपुजाय् ब्वति कयादीपिं सकसितं नेवाः परम्पराकथं ख्यें सगं बियाः नेवाः भ्वय् नकेगु ज्या नं जूगु खः । नेवाः नखःचखः, परम्परा, कला, संस्कृति संरक्षण व संवद्र्धनया निंतिं सन् २०११ य् संस्था नीस्वंगु खः ।