मेयर उम्मेदवारतय्सं गुलि खर्च यायेगु ?
येँ – वैशाख ३० गते जुइगु स्थानीय तहया निर्वाचनय् उम्मेदवार जुइपिंसं याइगु खर्चया सीमा व निर्वाचन आचार संहिता कडाइपूर्वक लागू यायेत निर्वाचन आयोगयात थीथी दलतय्सं सुझाव बिउगु दु । म्हिगः आयोगय् झिंन्हय्गू दलया पदाधिकारी दथुइ जूगु सहलहय् थ्व सुझाव बिउगु खः ।
निर्वाचन आयोगं थ्व स्थानीय तहया चुनावय् महानगरपालिकाया मेयर उम्मेदवार जुइपिंसं थःगु चुनावय् साढे ७ लाख तका जक खर्च याये दइगु सीमा निर्धारण याःगु दु । अथ हे उपमहानगरपालिकाया मेयर उम्मेदवारतय्सं साढे ५ लाख तका, नगरपालिकाया मेयर उम्मेदवारतय्सं साढे ३ लाख तका व गाउँपालिकाया अध्यक्ष उम्मेदवारतय्सं ३ लाख तका जक खर्च याये दइगु सीमा निर्धारण याःगु दु । राजनीतिक दलतय्सं धाःसा थ्व सीमायात स्वीकार याःगु मदुनि ।
निर्वाचनयात विश्वसनीय जुइकेगु नितिं व्यक्ति स्वयाः मखुसें ऐन व कानुनया आधारय् पलाः न्ह्याकेत सुझाव बिसें दलया प्रतिनिधिं ध्यबा खर्च यायेफइपिंत जक उम्मेदवार दयेकेगु गलत प्रवृत्तियात पनेत आयोगं थज्याःगु खर्चया सीमा निर्धारण यायेमाःगु खँ धाःगु दु ।
आयोगया प्रमुख निर्वाचन आयुक्त दिनेशकुमार थपलियां निर्वाचन आचार संहित कार्यान्वयन यायेगु झ्वलय् तुति खाकेगु ज्या जुइ मखु, मतदाता नामावलीइ नां दर्ता याकूपिं व मतदानया नितिं लाइनय् च्वंपिंत मतदान यायेगु व्यवस्था मिले याइगु जुइ धासें स्थानीय तहया निर्वाचनया नितिं आयोगं ६ हजार ७४३ प्रकारया मतपत्र डिजाइन यायेधुंकूगु जानकारी नं बियादिल ।
वय्कलं राष्ट्रिय दलया मान्यता मदुगु दल– तय्सं ल्ह्वना वयाच्वंगु निर्वाचन चिं सम्बन्धी माग व समस्याया निकास बीत आयोगं फयांफछि याकनं कुतः यायेगु खँ नं धयादीगु दु ।
LEAVE YOUR COMMENTS