
#अमृतलक्ष्मी तुलाधर
न्हापा न्हाय्कंत्वालय् छेँबलय् जिमि बा ग्यानरत्नया तःबाया कायपिनि छेँय् शंकर गुरुजुया तिसा दयेकीम्ह बालं च्वःवःगु । दुने प्यतँय् तिसा दयेकाच्वनी, पिने प्यतँय् मस्त आखः ब्वंकातइ । जिमि स्वम्ह तःकेहेँ नं, मेमेपिं नं आखः ब्वं वनेगु । कःसिं जक कुहां वंसां गाः । लिपा तःधिकःम्ह दाइ लक्ष्मिरत्न व पद्मदाइ पद्मोदय हाइस्कुलय् भर्ना जूवन ।
जि स्वंगू क्लासय् कन्या मन्दिर हाइस्कुलय् भर्ना जू वनागु । पद्मदाइ व जि नापं एलएसी नं आईए नं पास जूगु । लक्ष्मीदाइया नं आइए पास जूगु दु । पद्मदाई नेपालभाषा व अंग्रेजी एमए पास जूगु । लक्ष्मी दाइ ५८ दँ दुबलय् मंत ।न्हापा किजापुजाबलय् जिमि निनिपिनि किजापुजा याःगु खनाः जितः सुनां किजापुजा याइ धकाः ख्वःगुलिं जिमि मां दिव्यलानिं दाजु पद्मरत्नयात किजापुजा याकल ।
न्हाय्कंत्वालय् छेँबलय् पद्मदाई १९ दँ दुबलय् जि १७ दँ दुबलय् इहिपा जूगु । २०१५ सालय् इहिपा जूगु । लिपा ककापिंलिसे ब्यागः जुयाः लाजिम्पातय् बापिनि व कका पञ्चबीर सिंया छेँ दनाः च्वंवल । पद्मदाइ राजनीतिइ दुहां वंबलय् यक्व थासय् भाषण बिउ वनी । वं भाषण बीबलय् यक्व मनूत मुं वइ । मनूतसें लः त्वंके हइ, जिं मत्वना धाल ।
जनबहालय् भाषण बिउबलय् ज्वंवःबलय् मनूतसें बिसिके यंकल । जनबहालय् जिमि निनिया छेँय् दुत यंकाः छेरीइ खापा तिनाः चुकू तयाः तलय् यंकातल । लैनचौरय् भाषण बिउबलय् पुलिसतसें लिना हःगुलिं पद्मदाइपिनि छेँय् मनूत जायेक दुहां वल । लासाफांगा बिबिउँ लिमलाः धकाः तःधिम्ह पीत कमलप्रभां कन ।
थथे भाषण बिउ जूगुलिं बानं पतं मन्त्री जुइतिनि धाल । सरकार विरोधी भाषण बिउगुलिं ज्वना यंकूबलय् जिमि मां, निलशोभा पीत, जि, दुर्गालाल दाइ लिसें सेन्ट्रल जेलय् स्वःवनागु लुमं । पिहां वये मजियाः छेँय् भोताहितिं छेँ सू वल । अन चुक दुगुलिं मेपिंसं खनी धकाः स्व. दुर्गा गुरुजुं जिमि दाजुभत पुष्परत्नया छेँ भचा दुने लाःगुलिं अन प्यन्हु न्यान्हु च्वन ।
लिपा पद्मदाइया ससःकेहेँ मैत्रीशोभायाथाय् च्वंवन । लिपा २०४२ सालय् पञ्चायत कालय् सदनय् बहुदलयागु माग यानाःस्वतन्त्र उम्मेदवार कथं सूर्य चिं कयाः चुनाव ल्वाःबलय् आपालं भोटं त्यात । अले भारिं जात्रा यानाः देय् चाःहिइकल । भोताहितिं हःबलय् कुहां वनाः खादा क्वाखायेकः वना । अले ख्येँय्सगं बिउ वना ।
सगं बिउवःपिं हुल हुल दु । लिपा स्वास्थ्यमन्त्री जूबलय् निलशोभा पीतं मन्त्रि क्वाटरय् वनेगु वा धकाः फोन यानाहल । प्यन्हु न्यान्हु च्वनाः लिहां वया । लिपा २०४६ सालय् जनआन्दोलन जूबलय् पद्मदाईयात ज्वनायंकल । जिमि मांया लत्याबलय् व जेलय् लानाच्वन । लत्याया श्राद्ध यायेत छेँय् छ्वया हयेमखु धाःगुलिं अन हे अनसन च्वनाः तिनि छ्वयाहल हँ ।
श्राद्ध यानाः च्वंतले पुलिसत पाः च्वनाच्वन । लिपा त्वःता हल । पद्मदाइया तुति स्यानावःगुलिं जिमिथाय् छेँय् स्वाहाने गयेत थाकुगुलिं छेँय् हे किजापुजा याःवना । डा. अशोक वज्राचार्यं पद्मदाइया दक्वं क्वँय् भ्वाभः जुइधुंकल धाल धकाः कन । पद्मदाइ म्हं फुबलय् डाक्टरं एक्टिभ जुइमाः धाःगु धकाः क्वथाय् भुतुली दराज टेबिल हुयाच्वनी ।
छक्वः दमननाथ ढुंगाना वःबलय् पद्मदाइ क्वथा गज्याःगु सफा, छिं हे सफा यानागु ला धकाः न्यन हँ । छक्वः पद्मदाइयात पुज्य धम्मवति गुरुमामं जि छन्हु सीमानीम्ह खः धकाः न्हिं न्हिं लुमंकेमाः, अथे लुमंका च्वंसा सी त्यइबलय् ग्याइ मखु धाःगु धकाः कनाबलय् पद्मदाइ गज्याःगु हाःगु । उथाय् छु धाःगु खः ल्वःमन ।
पद्मदाइया ग्वाहालिं जिमि काय प्रबिन्द्रया इहिपा यानाबलय् लँ स्वःवनेगुया पलेसा मानव अधिकार संगठनयात झिद्वः दां बियागु । छेँय् हे मनू ब्वनाहल । हानं जिमि छय् प्रज्ञानया निदँ बुन्हिया यःमरि जहानपिंत, म्ह्याय्मस्तय्त जक बियाः मेपिंत इना बीगुया पलेसा सुवर्ण केशरीं चायेकातःगु जिथि भलसा छेँयात नं झिद्वः दां बियागु ।
पद्मदाइ नं यानाः थथे मेपिंसं मयाःकथं दान धर्म यायेखन । निर्मला पन्तयात बलात्कारलिपा स्याःगु टिभीइ वयाच्वंबलय् जिं छु यायेगु थ्व बलात्कारीतय्त धयाबलय् बुद्ध बूगु देश जूगुलिं नेपाःयागु कानुनय् स्यायेगु नियम मदु धाल । आः तुति स्याःगुलिं पिहां वनेमाःसा गबलें छय्पिंत पासा ब्वना यंकी । गुलिसिनं मोटर ज्वनाः काः वइ ।
खाताय् फ्यतुनाः लेख, ख्यालः, निबन्ध च्वयाच्वनी । न्हापा तुं च्वया मतया, च्वयाबिउ धालकि जक च्वयेगु धाल। तुति स्याःगुलिं निलशोभा पीतयात व छक्वः हिँ, थ्व छक्वः हिँ धाःसा मजुलकि झन् जुइ फइ मखु धकाः कया बीमखु । अले पद्मदाइनं न्हापा मां दनिबलय् निलशोभा छं पतंयात बिचाः याःगु मगाः धाःगु धकाः निम्ह हालाच्वनी ।
पद्मदाइया जंक्व यायेगु खँ जुयाच्वंबलय् जिं पद्मदाइ छं जंक्वबलय् छं द्यःवसः मेमेगु नं यक्व दु । उकिं द्यःवसः बीगुया पलेसा बुद्ध विहारया भवन दनेत ग्वाहालि कथं ध्यबा बी मजिउला धया । जिउ, मेपिनि सुयां मयाकथं न्हूगु छाँटं यायेगु बांलाः धाल । जिगु इच्छा पूवंगुलिं जितः लय्ताः वल । अले बुद्ध विहारया प्रमुख कोण्डण्य भन्तेयात जिमि काय व भौ वनाः ध्यबा बिउवन ।
भन्ते नं बिल बियाहःगु जंक्वबलय् व हे बिल पद्मदाइयात लः ल्हानाबिया । असंचालंबलय् थः छेँ वनाबलय् जि व पद्मदाइ नापं फ्यतुनाच्वनागु, पद्मदाइनं ल्हाः क्यनाः छम्हेसिनं सछिदँ तक म्वाइ धाःगु धकाः हानं निक्वःयागु जंक्व नं यायेगु धाल । जंक्व यानाः गुलिचां मदुनिबलय् जिमि कायनं पद्मदाइ अस्पतालय् यंकल धकाः फेसबुकय् तयातल धाल ।
छेँय् छक्वः फोन यानाछ्व धाल । फोन यानाबलय् सिविनया डाइरेक्टर सुम्निमां (पद्मदाइया चिधिकःम्ह म्ह्याय्) फोन ल्ह्वन । पद्मदाइयात छु जूगु धकाः न्यना । देपागु ल्हाः चले मजूगुलिं माइतीघरया अन्नपूर्ण अस्पतालय् यंकागु धाल । थ्व सिकं न्हापा छक्वः नं सुथय् दंम्हेसिया कायपिनि भौपिनि नां ल्वःमंगु । अले डाक्टर क्यनाः जिल ।
आः नं चान्हय् च्वफानाः द्यंम्ह सुथय् ७ बजेया समाचार न्यनेत चिग्वःगु रेडियो हजि धाःम्हेसिया सः नं प्रष्ट मजू, ल्हातं नं ज्वनेमफु । अले कायपिं, भौपिं थनाः म्ह्याय्पिं निम्हेसितं फोन यानाः अस्पताल यंकल । शुक्रबारजूगु जि आइतबार म्ह्याय्, कायपिं, जिमि जहाजन प्रेमरत्न कसाः स्वःवना । आइसियुलय् तयातःगु । छम्ह छम्ह जक दुत छ्वल ।
जि दुहां वनाः जवगु ल्हाः ज्वनाः पद्मदाइ जि वया धकाः धया । पद्मदाइ नं पिसाब मजुयाः नलि तयाः च्वफायेगु यानातःसां नं च्वः मवः । निम्हेसिनं ल्हाः ज्वनाः ट्वाइलेटय् च्व फाःवंसा वइ धाल । जितः थन बिचाः याःगु मगाः धाल । मिखा मकं । ताउत च्वने मजिउ धाःगुलिं वने न्हिं धया वया । लिपा पिसाब मजुयाः म्हय् फैलय् जुयाः म्ह मनावःगुलिं नर्भिक अस्पतालय् यंकल ।
भेन्टिलेटरय् तये धकाः ध्यबा काल, तये मलाकं मंत । न्हिनय् छेँय् हल ।पुज्य धम्मवति गुरुमांपिं सःताः परित्राण याकल । कन्हय्कुन्हु सुथय् छेँ क्वय्सं तयातल । यक्व मनूत स्वां, फांगा तयाः श्रद्धाञ्जलि बिउ वल । न्हिनय् साढे तीन बजेति सिथं यंकल । दिपय् उपप्रधानमन्त्री पाखें राष्ट्रिय ध्वाँचं फायेकल ।
सिथं यंकूसां निसें दिपय् तःधिम्ह काय सुजनं मि तःगु, चिधिकःम्ह काय सर्बन, म्हयाय्पिं सुनिता, सुम्निमापिंसं लः त्वंकाच्वंगु टिभीं क्यनाच्वन । दिपय् सी उनाच्वंगु गबलें स्वये मनंगु स्वये माल । न्हापा जिमि मां सीबलय् जिं मांयात गथे यानाः मि तयेगु धकाः गबाय्त मि मतसे च्वनाच्वन धाःगु ।
पद्मदाइ थौं थःत कायनं मि तयेकाः सिना वनेमाल । झी मनूतय् न्ह्याबलें म्वानाच्वने दइगु मखु । जन्म जुलकि मेपिं सित धाःसा नं जि नं छन्हु अथेहे सीमानिम्ह खः धकाः लुमंके माः धकाः पुज्य धम्मवति गुरुमामं कनाबिज्यात ।पद्मदाइ छ धन्य खः, छंगु गुणयात लुमंकाः म्वाःनिबलय् नं मानसम्मान यात । नागरिक अभिनन्दन यात ।
छ सी धुंकाः नं छेँय् प्वः छप्वः छप्वः ज्वनाः बिचाः वःपिं हुल हुल दु । पत्रिकाय् नं छन्त बिचाः हायेकूपिं गुलिमछि दु । जि ला छंगु बारे च्वयातःगु ब्वँब्वं लिमलाः । हानं सर्बरत्न धकाः छंगु बारे च्वयातःगु किताब पिकाल । छ न्हापांनिसें च्वयेसःम्ह खः । न्हापा झी बाःपिं ककापिं ल्हासाय् च्वंच्वंबलय् मामं स्यने म्वायेक छं हे च्वये सः ।
न्हापा चिठि च्वइबलय् न्हापालाक शुभभाषा धकाः च्वइ, अले तिनि मेमेगु च्वइ ।पद्मदाइ छ दनिबलय् जि थथे लेख च्वय्बलय् छंत मिले जू मजू क्यनेगु । आः छंगु लुमन्ति च्वयागु क्यनेत छ मदये धुंकल । जिं हे लुमंगु सिउगु च्वया । पद्मदाइ छ जि सद्यः दाजु हे खः । अय्सां छ सीबलय् जि ख्वये मवः । मेपिं जहानपिं ख्वया च्वन ।
छ सिनाः पुसया २६ गते सभागृहय् नागरिक अभिनन्दन याःबलय्यागु छं भाषण बिउगु टेलिभिजनय् वःगु जिमि कायया न्यनाच्वंगु छ म्वाःनिबलय्यागु छंगु सः ताःबलय् जितः ख्वये वल । कुने प्यतँय् च्वनाः याकःचा ख्वयाच्वना । दाजु केहेँयागु माया ला थ्व ?पद्मदाइ छ न्ह्याथाय् जन्म जूसां मगाःगु, मचाःगु पूवनाः याकनं जन्म मरण दुःखं मुक्त जुइमा धकाः आशिका यानाच्वना ।
छं केहेँ अमृत
LEAVE YOUR COMMENTS