टेकुया ताँ गुगुं नं इलय् दुना वनेफु

येँ – टेकु–कालिमाटी स्वाइगु ताँया गुणस्तरयात कयाः महालेखा परीक्षक ज्याकुथिं न्ह्यसः थंगु दु । महालेखाया ५६ औं प्रतिवेदनय् उगु ताँयात कयाः ‘यातायातया भार फये मफइ कथं गुणस्तरहीन निर्माण सामग्री छ्यलाः दयेकूगुलिं निर्माण दिकि धकाः निर्देशन बिलं नं वेवास्ता यानाः दयेकूगुलिं कारबाही यायेमाः’ धयातःगु दु ।

तत्कालीन काठमाडौं दिगो शहरी यातायात आयोजनां उगु ताँ दयेकेत पप्पु कन्स्ट्रक्सनलिसे सम्झौता याःगु खः । २०७२ साउन ७ गते दयेके क्वचायेमाःगु उगु ताँ छुं ई न्ह्यः तिनि दयेकेगु ज्या क्वचायेकूगु खः । तत्कालीन आयोजना प्रमुख अनन्त आचार्यं पप्पु कन्स्ट्रक्सनं ताँ दयेकेगु ज्याय् लार्पवाही याःगु धासें ताँ दयेकेगु ज्या दिकेत निर्देशन बिउगु खः ।

तर उकियात अटेर यानाः चांचां ताँ दयेकूगु खः । आयोजनां गुणस्तरहीन तार व डण्डी छ्यलाः ताँ दयेकूगुलिं उगु ताँ छ्यले बी मते धकाः ट्राफिकयात इनाप याःसां ताँ धाःसा छ्यला हे च्वंगु दनि । आयोजनां ताँ गुणस्तरहिन जूगुलिं गुगुं नं इलय् दुर्घटना जुइफइगु ख्याच्वः बिउसां ट्राफिकं नं उगु ताँय् चले जुइगु सवारी साधनयात पनाच्वंगु मदु ।

गुणस्तरहीन ताँय् आः नं तग्वःगु गाडी चले जुयाच्वंगुलिं दुर्घटना जुइगु सम्भावना दु धासें आयोजनां तत्काल सवारी साधन चले मयाकेत ट्राफिक प्रहरीयात इनाप यायेत्यंगु खँ धाःगु दु ।

सम्बन्धित बुखँ

LEAVE YOUR COMMENTS