यलया बौद्ध विहार पर्यटकीय आकर्षक गन्तव्य जुइगु

यल – राज्यया स्वंगुलिं तहया जनप्रतिनिधिपिंसं थनया ऐतिहासिक बौद्ध विहार, बहाः, बहीयात पर्यटकीय गन्तव्यया रुपय् विकास यायेमाःगु खँय् बः बिउगु दु । बुबहाः युवा समूहं यल महानगरपालिका–१६ या विशेष ग्वााहालिइ यशोधरवर्ण महाविहार बुबहालय् ग्वसाः ग्वःगु ‘मोहनि मेला २०७६’ ज्याझ्वलय् नवासें संघ, प्रदेश व स्थानीय तहया जनप्रतिनिधिपिंसं उगु खँय् बः बिउगु खः ।

यल क्षेत्र २ या सांसद कृष्णलाल महर्जनं मेलाया उलेज्या यासे बौद्ध विहारतय्गु संरक्षण यानाः पर्यटकतय्गु नितिं आकर्षक गन्तव्यया रुपय् विकास यायेमाःगु खँ धयादिल । प्रदेश ३ या सांसद शोभा शाक्यं यलया लिच्छविकालीन व मल्लकालीन बौद्ध विहारत बुद्ध दर्शन, संस्कृति, संस्कारया मूकेन्द्र जूगु खँ न्ह्यथँसें थुकियात पर्यटकीय ‘रुट ’य् लाकेत फुक्क छप्पँ जुयाः न्ह्यज्यायेमाःगु बिचाः प्वंकादिल ।

न्ह्यःने वयाच्वंगु भिजिट नेपाल सन् २०२० य् नेपाः दुहां वइपिं पर्यटकत च्वनीगुयात फलदायी यायेत बौद्ध विहार चाःहीकेगु, अनया जीवन्त संस्कृति विषयय् जानकारी बीगुकथं विशेष प्याकेज हयेफइगु नं वय्कलं धयादीगु दु ।प्रदेश ३ या मेम्ह सांसद ज्ञानेन्द्र शाक्यं यलयात सांस्कृतिक व पर्यटकीय नगरी घोषणा यायेमाःगु धारणा तयादिसें थुकिया नितिं राज्यया स्वंगुलिं तह छप्पँ जुयाः न्ह्यज्याये माःगु खँय् वय्कलं बः बियादिल ।

यल महानगरपालिका १६ या वडाध्यक्ष निर्मलरत्न शाक्यं वडा दुने संस्कृति, सम्पदा, बौद्ध विहारत आपालं दुगुलिं थुकियात ध्यानय् तयाः वडां संस्कृति, सम्पदाया संरक्षणयात न्हापांगु प्राथमिकताय् तयागु धाःगु दु ।

स्थानीय मिसातय्गु उद्यमशीलता विकास यायेगु आज्जुं मेला ग्वसाः ग्वःगु समूहया नायः बाबुराजा बज्राचार्यं धयादीगु दु । न्यान्हुतक न्ह्याइगु उगु मेलाया ल्यू ग्वसाः खलःया रुपं यशोधर बचत तथा ऋण सहकारी संस्था लि. व संरक्षकय् यशोधर महाविहार सुधार समिति च्वंगु दु ।