जिगु जन्म येँया पाको पुखुद्यां त्वालय् जूगु खः । थौंकन्हय् थ्व थाय्यात न्यूरोड, नयाँ सडक धयाः पुलांगु नांयात ल्वःमंका छ्वयेधुंकल । थौंकन्हय् दुगु वंगल सिमाया नापसं हे जिमिगु छेँ खः । जिमि बाज्यायात मोति धाइगु, जिमि बाःयात मोतिभाई धाइगु । बाःया धाथेंया नां धाःसा अष्टनारायण मानन्धर खः । पाकोया थःगु हे छेँय् बाःया जाकिबजि पसः दुगु खः । मानन्धरतय्गु छगू प्रमुख त्वाः मध्ये पुखुद्यां नं खः । थन च्वंपिं मानन्धरतय्त पुखुद्यांमि धाइ ।
न्यूरोड धाल कि थौंकन्हय् राजधानी येँ देय्या हे दकलय् व्यस्त व चले जूगु थाय् जुइधुंकल । तर जि मचाबलय् तक थ्व थाय् थथे चले मजूनि । वंगल सिमाया नापसं च्वंगु भूगोलपार्क न्हापा खुल्ला व खालीगु थाय् खः । जिपिं मचाबलय् अन हे म्हितः वनेगु । थौंकन्हय् नेपाल बैंक लिमिटेडया ज्याकू तयातःगु थाय् न्हापा पुखू खः । व पुखुली जिपिं हे म्हितः वने नं । अन पुखुली दुकाये यः नं धाइगु । अन सल तइगु छगू तबेला नं दुगु खः । उकिं जिपिं तबेलाय् म्हितः वनेगु धकाः अन वनेगु खः ।
पाकोया वंगल सिमा धाल कि फुकस्यां सिउ । थ्वहे वंगल सिमाया न्ह्यःनेसं मोटरसाइकल बालगिरी बीगु जिमिगु पसः दुगु खः । नेपालय् थथे मोटरसाइकल बालगिरी बीगु ज्याया सुरुवात यानापिं हे जिपिं धाःसां जिउ । जिमि दाजु रामप्रसाद मानन्धरं अन हे च्वंम्ह थः पासा पञ्चनारायणलिसे जानाः छगः मोटरसाइकल न्याना हःगु खः । लिपा पञ्चनारायण पार्टनर छुटे जुइवं उगु मोटरसाइकल १३०० तका दामं जिमिसं हे न्याना कया । उगु मोटरसाइकलया नम्बर खः २६९ । अले दाजु व जि जानाः पसः चले याना ।
वहे इलय् बेलायतया लागिं नेपाली राजदूतावासया सेक्रेटरी जुयादीम्ह रामप्रसाद मानन्धर (वय्कः मेम्ह हे रामप्रसाद खः ।
वय्कः जिमि निनिया भाःत नं खः) बेलायतय् थःगु कार्यकाल सिधयेकाः लिहां झाल । लिहां वःबलय् वय्कःपिंसं बेलायतया जेम्स एक्सल्सर कम्पनीया निगः मोटरसाइकल नं ज्वना वःगु जुयाच्वन । उकी मध्ये छगः जिमिसं २५०० तकां न्याना कया । ल्यं दुगु छगः नं लिपा जिमिसं हे न्याना ।
अबले येँय् मोटरसाइकल चले जुइगु तसकं कम । चले याये सःपिं मनूत हे मदु । तापाक वने माःपिं मनूतय्त जिमिसं लिउने तयाः गन वनेमाःगु खः अन त्वःता थकेगु, अले उकिया भाडा कायेगु । थौंकन्हय् ट्याक्सी थें । अबले छम्ह डिट्ठा साब दु । वयात न्हूसतकं न्हिंन्हिं जावलाख्यः तक त्वःतः वनेगु । उकिया भाडा स्वम्वहः कायेगु । मोटरसाइकल चले याये मसःपिं नं यक्व हे ल्याय्म्हतय्त चले यायेगु स्यना बिया । घन्टां ५ तका कायेगु । अले चले यायेगु स्यनाबीगु । उकिं आः तक नं जितः मोटरसाइकल स्यना बिउम्ह गुरु धकाः माने याः वइपिं यक्व हे दनि ।
लिपा अंशबन्डा जुइवं दाजुं नं पसः त्वःता वन । जि याकःचां चले याना । वयां लिपा निगः मोटरसाइकल न्यानाः थपे याना । छगः ६२०० तकां न्यानागु, छगः ६८०० तकां न्यानागु ।
अबले पेट्रोल न्यायेगु थाय् नं न्हूसतकय् हे दु । नेपाल आयल स्टोर धाइगु उगु पसः नेपाःया हे न्हापांगु पेट्रोल पम्प खः । तर अबले आः थें अःखुंचां (नोजलं) मोटरसाइकलय् तप्यंक पेट्रोल जायेकीगु मखु । पम्पुं सालाः ५ लिटरया ग्यालेन जायेकी, अले वहे ग्यालनंट्यांकीइ क्वफाइ । १ ग्यालन पेट्रोलया भाः ७ मोहर काइगु ।
अबले येँय् साइकल गइपिं तकं म्हो । मोटरसाइकल गइपिं ला दरवारय् जागिर दुपिंसं जक खः । विदेशं नेपाः वयाच्वंपिं अंग्रेजतय्सं धाःसा आइतवाः पतिकं बिदा जुइगुलिं मोटरसाइकल बुक याः वइगु । नेपाःमित धाःसा गये सःपिं यक्व मदुगुलिं उमित न्हापां स्यना निं बीमाः । अथे स्यं वनेबलय् तःक्वःमछि ट्राफिकं ज्वना नं यंकल । अथे ज्वँ जक ज्वंगुलिं ०३१ सालपाखे मोटरसाइकल बालगिरी बीगु पसः हे त्वःता बिया ।
पाकोय् जिमि जाकिबजि पसः नं दु । अबले पसः धइगु तसकं कम जक दु । मेपिनि छेँय् ला पसःक्वः तकं मदु । छ्यलि अथें त्वःता तइगु खः । २००५ सालय् जनसेवा हल खोले जुल । उकियात हे ध्यानय् तयाः थौंकन्हय् फोटो कन्सर्न दुगु छेँय् जिमि बाःनं छगू च्या पसः तयादिल । अबले वय्कःया पार्टनर जुयादीम्ह सानु कका धाःम्ह दु, वय्कः येँ मनपाया पुलांम्ह मेयर केशव स्थापितया तःबाः खः । उगु पसःया बाः दँय् २०० तका पुलेमाः ।
जिं न्यना तयाकथं ९० सालया भुखाय् न्ह्यः तक थन तबालागु लँ मदु । खिचापुखुलिं वयाः रञ्जना गल्लि जुयाः फसिक्यब वनेगु छपु चिबालागु लँ जक दु । रञ्जना हलंनिसें कयाः थुखे तेबहाः वनेगु लँ (पुलांगु अमेरिकन लाइब्रेरी) तक क्यब खः । फसि सइगु क्यब जूगुलिं थ्वयात ‘फसिक्यब’ धाल । थ्व फसि सइगु पूरा क्यब हे पाःलूगु थाय् खः । व पाःया क्वसं च्वंगु थाय् जूगुलिं थ्व थाय्या नां ‘पाक्व’ जू वन । थन वस्ती बसे जुइ न्ह्यः वा वइबलय् पाःलूगु फसिक्यबया लः फुक्क कुहां वयाः थ्वहे पाक्वया नापसं च्वंगु पुखुली मुं वनीगु जुइमाः ।
आः नेपाल बैंक दुगु थाय् पुखू खःसा गोरखापत्र संस्थान दुगु लाइन फुक्क पुखूया द्यां खः । थ्व लाइनय् साय्मितय्गु छेँ मदु । साय्मितय्गु छेँ फुक्क थ्व लाइनया न्ह्यःने च्वंगु झ्वलय् जक दु । ९० सालया भुखाय् लिपा जुद्ध शमशेर थःगु सालीक छगू दथुइ तयाः वया प्यखेरं प्यपु तबालागु सतक दयेके बिल । वहे सतकयात न्हूसतक धाइगु खः । न्हूसतक दयेकेधुंकाः थ्व थासय् मनूतय् वये–वने नं अप्वया वल व बुलुहुँ व्यस्त बजाः जुया वन ।
LEAVE YOUR COMMENTS