निर्वाचन क्षेत्रया बजेट छु यायेगु ?

येँ – प्रत्येक सांसदयात थःपिनि निर्वाचन क्षेत्रया विकासय् खर्च यायेगु धकाः सरकारं छुटे याना तःगु बजेट आः छु यायेगु धइगु न्ह्यसः पिहां वःगु दु ।संविधानसभाया ६०१ म्ह सांसदया लागिं सरकारं बजेटय् विनियोजन याःगु ११ अर्ब तका दां आः गय् यानाः खर्च यायेगु धइगु समस्या सरकारयात वःगु खः । न्हापा देशय् २४० निर्वाचन क्षेत्र दुगु खःसा आः १६५ जक क्षेत्र कायम जूगु दु । लिसें सांसदत नं २७५ म्ह जक दु । पुलांगु निर्वाचन क्षेत्रया लागिं फ्याना तःगु बजेट न्हूगु निर्वाचन क्षेत्रय् गय् यानाः खर्च यायेगु धइगु समस्या पिहां वःगु खः ।

निर्वाचन क्षेत्र विकासया लागिं फ्यानातःगु थ्व बजेट गय् यानाः खर्च यायेगु धकाः सरकारयात समस्या जुयाच्वंगु इलय् मेखे प्रतिनिधिसभाया गुलिखे सांसदतय्सं धाःसा निर्वाचन क्षेत्र विकासया लागिं सरकारं फ्यानातःगु थ्व दां माल धकाः दावी समेत याः वनाच्वंगु खँ नं धाःगु दु । अर्थ मन्त्रालय सूत्रं धाः कथं न्हापा २४० निर्वाचन क्षेत्रया लागिं फ्यानातःगु थ्व दां १६५ निर्वाचन क्षेत्रय् दामासायीं इना छ्वयेमाःगु माग समेत वर्तमान सांसदतय्सं यानाच्वंगु दु । अन्यौलं यानाः अन्ततः थ्व ११ अर्ब तका फ्रिज जुइ फइगु खँ नं सूत्रं धाःगु दु ।