येँ १५ वडाय् मिसातय्त आत्मरक्षा तालिम

येँ(नेपालभाषा टाइम्स)- येँ महानगरपलिका १५ वडाया ग्वसालय् न्ह्याःगु छवाःयंकंया आत्मरक्षा तालिम क्वचाःगु दु । येँ १५ वडां मिसातय्त लक्षित यानाः उगु तालिम संचालन याःगु खः ।

तालिम समापन ज्याझ्वलय् नवासें मूपाहांकथं झायादीम्ह येँ महानगरपालिका १५ वडाअध्यक्ष ईश्वरमान डंगोलं समाजय् मिसातय्त कमजोर तायेकीगु व थ्व हे कारणं मिसातय्त जुइगु हिंसाया न्यूनीकरणयात लक्षित यानाः तालिम संचालन यानागु जानकारी बियादिल ।

मिसात थः हे सुरक्षित जुयाः वनेमाःगु बाध्यताया दथुइ थुकथंया तालिमं मिसातय्त थः हे सुरक्षित जुइत अझ परिपक्व याइगु नापं जीवनोपयोगी व फलदायी जुइगु विश्वास नं वय्कलं प्वंकादिल ।

तालिमय् प्राविधिक ग्वाहालि याःगु स्वयम्भू ट्रेडिशनल कुङफु ट्रेनिङ्ग सेन्टरया अध्यक्ष राजु नेपालीं मिसा हिंसापाखें बचे जुइत, मिसा हिंसाया बारे सचेतना ब्वलंकेत व थःत जुइफुगु सम्भावित आक्रमणपाखें गुकथं प्रतिकार व प्रतिरक्षा यायेगु धइगु खँय् केन्द्रीत जुयाः शारीरिक व सैद्धान्तिक तालिम बियागु खँ कनादिल ।

वडा दुनेया थीथी ब्वनेकुथिया न्यय्म्ह स्वयां अप्वः विद्यार्थीं ब्वति काःगु तालिम स्वयम्भू खेलकुद विकास समितिया संयोजनय् जूगु खः । उगु इलय् मिसां हिंसा जुइगुया कारण, कानूनी उपचार, घटना जुल धाःसा गुकथं न्यायया निंतिं ल्वायेगु धइगु बारे प्रशिक्षार्थीतय्त शारीरिक व मनोवैज्ञानकि परामर्श नं बिउगु खः ।