गृह व अर्थ माओवादीयात मबीगु प्रमया अडानं विस्तार मजुल

येँ – एमाले व माओवादी दथुइ मन्त्रालयया भागबण्डा मिले जूसां गृह व अर्थ मन्त्रालयया खँय् धाःसा विवाद जुयाच्वंगु खँ सीदुगु दु । थ्वहे कारणं यानाः म्हिगः मन्त्रिमण्डल विस्तार जुइ मफुगु खँ सूत्रं धाःगु दु । प्रधानमन्त्री केपी ओलीं गृह व अर्थ थःपिंत हे बीमाः धकाः दावी यानादीगुलिं खँ मिले मजूगु सूत्रया दावी दु । मेगु मन्त्रालयया हकय् धाःसा खँ मिले जुइधुंकूगु दु ।

एमालें अर्थ, परराष्ट्र, भौतिक पूर्वाधार, सञ्चार, संघीय मामिला लिसें सामान्य प्रशासन लगातय झिगू मन्त्रालयय् दावी यानाच्वंगु दुसा माओवादीं गृह, अर्थ व ऊर्जा सहित न्हय्गू मन्त्रालयय् दावी यानाच्वंगु दु । मन्त्रालयया भागबण्डा क्वःछीवं एमाले व माओवादी नेतात मन्त्री ल्ययेगु गृहकार्य न्ह्याकूगु दु । एमालेया भागय् अर्थ तथा योजना, परराष्ट्र, रक्षा, भौतिक पूर्वाधार तथा यातायात, संघीय मामिला तथा सामान्य प्रशासन, सूचना तथा सञ्चार, कानून न्याय तथा संसदीय मामिला, पर्यटन, शिक्षा तथा खेलकुद व जनसंख्या मन्त्रालय लाःगु दु ।