बहुमंगलद्वार चैत्य पर्यटकतय् आकर्षणया केन्द्र

येँ – स्वयम्भूया बहुमंगलद्वार चैत्य पर्यटकतय् निंतिं आकर्षणया केन्द्र जूगु दु । विश्व सम्पदाया धलखय् दुथ्यानाच्वंगु स्वयम्भूया उगु चैत्य लिपांगु इलय् पर्यटकतय् निंतिं आकर्षणया केन्द्र जुया वनाच्वंगु दु । २०७२ साल बैशाख १२ गते गोरखा केन्द्रविन्दु जुयाः ब्वःगु तःभुखाचं स्वयम्भूय आपालं सम्पदात क्षतिग्रस्त याःगु खः ।

उगु तःभुखाचं क्षति जूगु सम्पदास्थल मध्ये छगू बहुमंगलद्वार छुं ई न्ह्यः जक पुनःनिर्माण यायेगु ज्या क्वचाःगु खः । स्वयम्भू व्यवस्थापन तथा संरक्षण महासमितिया महासचिव महेन्द्र बुद्धाचार्ययाकथं ५५ गू लाख लागतय् उगु चैत्य पुनःनिर्माण याःगु खः ।

महाचैत्य व उकिया जःखः च्वनाः स्वनिगःया दृश्यावलोकन यायेबलय् आनन्द व शान्तिया अनुभूति याये फइगु जूगुलिं स्वयम्भूइ स्वदेशी व विदेशी पर्यटकतय् आकर्षण अप्वया वनाच्वंगु दु ।

न्यागू खण्डय् १० मिटर तजाःगु चैत्य निर्माणय् प्रयोग जूगु शिल्प, कला कौशल, शैली व वास्तुकलाया कारणं उगु चैत्यं यक्वसिया नुगः त्याकेत सफल जुयाच्वंगु दु । उगु चैत्यय् थीथी देवीदेवताया चीधंगु व तःधंगु यानाः १२० मूर्ति दुगुलिं नं अन वइपिं पर्यटकत आकर्षित जुयाच्वंगु खः ।