बैंकपाखें भुक्तानी यायेत चेक च्वये म्वाल
येँ – आवंलिं छिं सुयातं बैंक मार्फत भुक्तानी यायेमाल धाःसा चेक च्वयाः क्लियरिङय् छ्वया हे च्वनेम्वालीगु जूगु दु । चेक क्लियरिङ्ग हे यायेम्वायेक छगू खातां मेगु खाताय् भुक्तानी यायेफइगु ‘रियल टाइम ग्रस सेटलमेन्ट सिस्टम (आरटिजिएस) प्रविधि नेपाःया बैंकय् नं संचालनय् वःगु दु ।
थ्व प्रविधिया उलेज्या आइतवाः छगू ज्याझ्व दथुइ डा. चिरञ्जिबी नेपाल व लन्दनया मेयर पिटर एलस्टिनं मंकाः कथं यानादीगु दु ।
आरटिएस सुविधापाखें आः छिं तप्यंक थःगु बैंकय् वनाः थःम्हं भुक्तानी यायेमाःगु बैंकया खाताय् ध्यबा तयाबीफइगु जूगु दु । गथेकि छिगु प्राइम बैंकय् खाता दु, अले छिं थःम्हं भुक्तानी यायेमाःम्हेसिया खाता सिटिजन्स बैंकय् दु धाये ।
अथे जुल धाःसा छि थःगु खाता दु प्राइम बैंकय् झासँ, अले अन सिटिजन्स बैंकय् थुलि खाता नम्बरय्, थुम्ह मनूयात थुलि ध्यबा भुक्तानी यानाबियादिसँ धकाः छगू फारम जायेकाबिल धाःसा प्राइमं तुरुन्त छिं भुक्तानी यायेमाःम्हेसिया खाताय् ध्यबा जम्मा यानाबी । आरटिएस धाइगु थ्व प्रविधिं यानाः बैंकतय्त लबः दइगु जूगु दुसा ग्राहकतय्सं नं तुरुन्त भुक्तानी कायेफइगु जूगु दु ।
नेपाल राष्ट्र बैंकं आःयात निगू लाख स्वयां च्वय्या भुक्तानीइ थ्व सेवा सुरु याःगु खः ।
२० लाख स्वयां च्वय्या भुक्तानीइ ला आरटिएस अनिवार्य हे याःगु दु ।
थ्व प्रविधिया कारणं बैंकतय्सं यक्व चेक छापे याना च्वनेमाली मखु, गुकिं यानाः उमिगु ध्यबा बचे जुइ । मेखे ग्राहकतय्सं नं ध्यबा कायेगु निंतिं पिया च्वनेमाली मखु । चेक च्वयाः बीबलय् उकियात क्लियरिङ यायेबलय् छन्हु निसें निन्हु तक ई काइ, अथे जुइबलय् ध्यबा तुरुन्त ल्हातय् लाके फइमखु ।
मेखे थ्व प्रविधिया कारणं ध्यबाया ट्रान्जेक्सन नं तुरुन्त तुरुन्त जुइगु जुइ । चेक च्वयाः क्लियरिङ यायेबलय् तकया इलय् छक्व ट्रान्जेक्सन जुइगु ध्यबा आरटिएस पाखें झिक्वः तक यायेफइ । नेपाल राष्ट्र बैंकं आःयात निगू लाख स्वयां च्वय्या भुक्तानीइ थ्व सेवा सुरु याःगु खः । २० लाख स्वयां च्वय्या भुक्तानीइ ला आरटिजिएस अनिवार्य हे याःगु दु ।
आःयात ग्राहकतय्त बानी मजूतलेया निंतिं चेक नं चले यानाच्वनेगु खँ राष्ट्र बैंकं धाःगु दु ।थ्व प्रविधिइ नेपालय् संचालन जुयाच्वंगु २८ गुलिं बैंकत दुथ्यायेधुंकूगु दु । वइगु पुस निसें विकास बैंक व फाइनान्सय् नं थ्व प्रविधि लागु यायेगु खँ राष्ट्र बैंकं धाःगु दु ।
राष्ट्र बैंकं २०६३ सालया मौद्रिक नीतिइ हे आरटिएस लागू यायेगु खँ न्ह्यथनातःगु खः । तर प्राविधिक कारणं थुकियात लागु याये मफयाच्वंगु खः । आरटिएसपाखें कारोवार यायेगु निंतिं आःयात छगू कारोवारय् झितका शुल्क पुलेमाली । बहनी भुक्तानी यायेबलय् धाःसा १०० तका पुलेमालीगु खँ धाःगु दु ।
LEAVE YOUR COMMENTS