येँ देय् अवश्य दयेकेफइ

# न्हुछेकाजी महर्जन

सफाइ अड्डाया नामं पलिस्था जूगु नगरपालिका, नगरपञ्चायत धुंकाः महानगरपालिका जूगु नं २४ दँ दत । दकलय् न्हापां महानगरपालिका घोषणा जूगु येँ महानगरपालिका हे खः । ३० दँया पञ्चायति व्यवस्था क्वःथलाः बहुदलीय व्यवस्था लागू जुयाः न्हापांगु स्थानीय तहया निर्वाचनं त्यानावःपिं जनप्रतिनिधिपिनिगु पालय् जूगु थ्व घोषणा लिपा छगू कार्यकाल जक हानं निर्वाचन जूगु खः ।

संघीयता लागु जुइ धुंकाः न्हापांगु स्थानीय सरकारं यायेत्यंगु थ्व महानगर दिवस छगू अतिकं महत्वपूर्ण इलय् जुइत्यंगु दु । सफाइ अड्डा पलिस्था जूगु दँयात आधार कायेगु खःसा थ्व दिवस सच्छिक्वःगु जुइमाः । ९९ दँ फुनाः १०० दँ क्यंगु दु, उकिं नं थ्व दँ अतिकं महत्वपूर्ण खः ।

अथेहे थ्व दँय् निसें परम्परागत गुथि संचालन यानाः न्ह्याका वयाच्वंगु बाजंया मू गुरुपिंत नं वय्कःपिंसं याना वयाच्वंगु योगदानया कदर यासें आर्थिक ग्वाहालि नापं सम्मान यायेत्यंगु दु । दीर्घसेवी कर्मचारी, पत्रकार, कासामिपिंत नं सम्मान यायेत्यंगु उगु ज्याझ्वलय् थीथी विषयय् विद्यालयस्तरीय निबन्ध, हुलाप्याखं धेंधेंबल्लाः कासा यानाः सिरपाः बिइगु दु ।

थ्व पालय् जनप्रतिनिधिपिंसं नक्सा च्वयाः जग तयेगु ज्या यानाच्वंगु दु धयागु सिइकादीत इनाप याना । बुलुहुं ज्या खने दयावइ, राजनीतिक अवस्थाय् विरोध जक मयासें सकारात्मक सुझाव बियादिसँ, येँ देय् अवश्य दयेकेफइ ।

थुकथं हे सतवार्षिकोत्सव माने यानाः दछियंकं थीथी ज्याझ्वः जुया तुं च्वनीगु दु । थौंकन्हय् संघीयता लागु जुयाः न्हापांगु निर्वाचनं वःगु नेतृत्वं ज्या याये मफुगु यक्व खँ पिहां वयाच्वंगु खँयात दुवालाः स्वयेबलय् २०७२ साल वैशाख १२ गते वःगु भुखाचं भतांभुंग जूगु अवस्था, मेलम्ची लःया निंतिं फुक्क लँ म्हुयाच्वंगु अवस्था, अले १५ दँ तक जनप्रतिनिधिविहीन जूगु अवस्थाय् न्हू वःगु स्थानीय सरकारं जनताया महत्वाकांक्षी आकांक्षा आः थथें पूवंके फइगु अवस्था मदुगु ला खः हे खत, तर थज्याःगु अवस्थाय् नं ज्या यायेगु कुतः मजूगु मखु ।

न्यूनतम पूर्वाधार तयार जुयाच्वंगु दु, वडा वडाय् माक्वः बजेट छ्वयाच्वंगु दु, निर्माण ज्या जुयाच्वंगु दु । मरुसतः (काष्ठमण्डप), धरग्वारा, रानीपुखू लगायत त्वाःत्वाःया गुथि छेँ दयेकेगु ज्या न्ह्यायेधुंकूगु दु । छुं नं भौतिक निर्माणया निंतिं पूर्वाधार तयार जुइमाः व तयार जुयाच्वंगु दु । पूर्वाधार तयार यायेगु ज्या सुनां खनी मखु, ई नं भचा अप्वः काइ, उकिं वर्तमान अवस्थाय् ज्या जूगु खनेमदुगु खः ।

धैर्य यानाच्वन, राजनैतिक अवस्थां विरोध मजुल धाःसा थ्व अवधीइ जनताया आकांक्षा अप्वः धयाथें पूवनी । संघीयता वयेधुंकाः जुइगु निर्वाचनं वःगु स्थानीय सरकारयाके दयेमाःगु ऐन नियमत तयार जूगु मदुनि, गुलिखे तयार जुइगु क्रमय् दु । संविधानय् व्याख्या यानामतःगु गुलिखे अधिकारया बारे मतभिन्नता जुयाच्वंगु दु ।

झन प्रदेश सरकार व स्थानीय सरकारयाके दुगु मंकाः अधिकारयात कयाः ला अझ स्पष्ट जुइ फयाच्वंगु मदुनि । थुकिं नं छु स्पष्ट जू धायेबलय् स्थानीय सरकारं दु्रतगतिं ज्या याये फयाच्वंगु मदु, तर यक्व ज्याया पूर्वाधार तयार जुइधुंकूगु दु । साझा यातायात नाप जानाः ततग्वःगु बस संचालन, मोनो मेट्रो रेलया डीपीआर दयेकेगु आदि ज्या सुरु जुइधुंकूगु दु ।

लँ सफा यायेत बु्रमर वयेत्यंगु दु, न्हून्हूगु जेट वये धुंकूगु दु । थाय्थासय् लँ दयेकेगु ज्या जुयाच्वंगु दु । तर मेयरं ज्या हे मयाः धयाच्वंगुया दु । वय्कलं बजेटयात विकेन्द्रीकरण यानाः छ्वयाच्वंगु दु, प्रत्येक वडा वडाय् माक्व बजेट विनियोजन यानाबिउगु दु, प्रत्येक वडां ज्या याःगु नं ला मेयरं याःगु ज्या खः नि ।

म्हिगः (न्हापायापिं) मेयरपिंसं थें बजेट केन्द्रीकृत यानाः, थःथाय् जक चाकुइ भुजिं भुं थें यानाः बजेट धालकि ‘का ना’ धकाः बिया छ्वयाः जक ज्या जुइगु खः कि ? थज्याःगु भ्रमय् च्वनामदीत इनाप याये ।छथ्वः मनूतय्के दृष्टिभ्रम जुयाच्वंगु नं जिं तायेका च्वनागु दु ।

थानकोटया लँ स्यंसां येँया मेयर, जोरपाटीइ लँ स्यंसां येँया मेयर, ततःबालागु लँ स्यंसां मेयरं जक ज्या मयाः धायेगु जुयाच्वंगु दु, तर थानकोट छु नगरपालिकाय् ला, जोरपाटी छु नगरपालिकाय् ला, ततः बालागु लँ (८ मिटर स्वयां तबालागु) सुयागु जिम्माय् लाः धयागु नं सिइके माल, अले लानीपुखु, धरग्वारा, काष्ठमण्डप (मरुसतः) लगायत थीथी सम्पदा सुयागु जिम्माय् लाः, गबलय् स्यन, सुयागु पालय् स्यन, सुनां दयेकेमफुत धयागु लिफः स्वयाः विरोध याःसा वा सुझाव बिउसा बांलाइगु तायेकाच्वना ।

थथे भताभुंग जुयाच्वंगु इलय् त्यानावःपिं जनप्रतिनिधि गुपिं न्हूगु अवस्थाय् त्याःगु दु, नियम कानुनया अभावय् पुलांगु हे कथं ज्या यानाच्वनेमाःगु दु, जनताया आकांक्षा यक्व दुगु इलय् ज्या मखनीगु स्वाभाविक खः । थःगु निजी छेँ छखा दयेकेत ला पुलांगु छेँ पिइमाल, नक्सापास यायेमाल, जग म्हुयाः जग स्वनाः डिपिसि तक यायेगु इलय् तक ज्या जूगु हे खनीमखु ।

ध्यबा व ई उकथं हे खर्च जुइधुंकी, जब तल्ला थप जुयावइ, अले तिनि छेँ दयेका थें च्वनी । थथे हे थ्व पालय् जनप्रतिनिधिपिंसं नक्सा च्वयाः जग तयेगु ज्या यानाच्वंगु दु धयागु सिइकादीत इनाप याना । बुलुहुं ज्या खने दयावइ, राजनीतिक अवस्थाय् विरोध जक मयासें सकारात्मक सुझाव बियादिसँ, येँ देय् अवश्य दयेकेफइ ।

अन्तय्, महानगर दिवसया लसताय् सकल महानगरवासीपिनि भिंतुना च्वना । जय मांभाय् । सुभाय्
(च्वमि येँ महानगपालिका वडा न.ं १८या वडा अध्यक्ष लिसें महानगर महोत्सवया कजि खः ।

 

सम्बन्धित बुखँ

LEAVE YOUR COMMENTS