प्यंगू देय्या कला प्रदर्शनी क्वचाल

येँ – अन्तर्राष्ट्रिय जलरंग समाजया ग्वसालय् जूगु कला प्रदर्शनी क्वचाःगु दु । समाजं नेपाल ललितकला प्रज्ञा प्रतिष्ठानया सहकार्यय् उगु कला प्रदर्शनीया ग्वसाः ग्वःगु खः । झिंछन्हुतक न्ह्याःगु कला प्रदर्शनीइ नेपाःलिसें चीन, भारत, बंगलादेशनापं यानाः प्यंगू देय्या कला प्रदर्शनी जूगु खः । कला प्रदर्शनीइ सहभागि देय्या चर्चित कलाकारतय् चित्र प्रदर्शनीइ तयातःगु खः ।

उगु कला प्रदर्शनीं सहभागि देय्लिसे सम्बन्ध विस्तार यायेगु नापं कलाया बारे आपालं खँ सयेकेगु ह्वःताः चूलाःगु धाःगु दु । प्यंगू देय्या अग्रज कलाकारतय् चित्र दुथ्याःगु कला प्रदर्शनीपाखें थवंथवय् सम्बन्ध विस्तार यायेगुलिइ ग्वाहालि जूगु नापं विदेशी चित्रकारतय् चित्रपाखें नेपाली कलाकारतय्सं सयेगु अवसर नं प्राप्त याःगु समाजया अध्यक्ष एनबी गुरुङं कनादिल ।

प्रदर्शनीया हे झ्वलय् आपालं कलाकारतय्सं स्थलगत रुपं हे चित्र च्वयेगु ज्या नं याःगु खः । नेपाःया पीस्वम्ह, भारतया झिंन्याम्ह, बंगलादेश व चीनया झिंछम्ह, झिंछम्ह चित्रकारतय् सहभागिता दुगु कला प्रदर्शनी द्वःछि स्वयां अप्वःसिनं अवलोकन याःगु समाजं जानकारी बिउगु दु ।