न्यूनतम पारिश्रमिक कार्यान्वयनय् समस्या व समाधान विषयय् अन्तक्र्रिया

येँ – न्यूनतम पारिश्रमिक कार्यान्वयाय् खने दयाच्वंगु समस्या व उकिया समाधानया निंतिं उपाय मालेगु विषयय् छगू अन्तक्र्रिया ज्याझ्वः जुल । नेपाल पत्रकार महासंघ उपत्यका प्रदेश समिति, एशोसियट प्रदेश समिति व प्रतिष्ठान प्रदेश समितिया मंकाः ग्वसालय् उगु अन्तक्र्रिया ज्याझ्वः नेपाल पत्रकार महासंघया ज्याकू संचारग्रामय् जूगु खः ।

अन्तक्र्रिया ज्याझ्वःया मूपाहां नेपाल पत्रकार महासंघया केन्द्रीय अध्यक्ष गोविन्द आचार्यं पत्रकार संगठन संक्रमणय् लानाच्वंगु खँ न्ह्यथनादिसें देशय् संघीयता वःसां पत्रकारतय्सं उकिया महसुस याये मफयाच्वंगु व संघीय संरचनायात ल्वयेक थीथी कानून तयार यायेगु ज्या जूसां व समय सापेक्षकथं लागू जुयाच्वंगु मदु धयादिल ।

महासंघया उपत्यका प्रदेश समितिया अध्यक्ष एन.के. दाहालया सभापतित्वय् जूगु अन्तक्र्रियाय् प्रेस संगठन नेपालया अध्यक्ष महेश्वर दाहालं ०४६ सालया जनआन्दोलन लिपा अप्रत्याशित रुपं अप्वःगु प्रेस जगतय् सुधारया आवश्यकता दुगु खँ धयादिल । लिसें वय्कलं पत्रकार महासंघयात गैर संस्थाया पहुँचं पिने यंकाः ट्रेड युनियनपाखे यंकेत स्वयाच्वंगु नं धयादिल ।

ज्याझ्वलय् महासंघया महासचिव रमेश विष्ट, सचिव रामप्रसाद दाहाल, न्युनतम पारिश्रमिक निर्धारण समितिया अध्यक्ष गंगाधर पराजुली व एशोसियट प्रदेशया अध्यक्ष केबी उप्रेतीपिंसं नं थःथःगु धारणा तयादीगु खः ।