फास्ट ट्राय्कया जिरो प्वाइन्ट ख्वनाय्

येँ – येँ-निजगढ स्वाइगु फास्ट ट्राय्कया जिरो प्वाइन्ट ख्वनाय् हे तइगु जूगु दु । तर सिकाली देगः व ख्वनाया प्राचीन सम्पदा कुदेश क्षेत्रयात संरक्षण यायेगु कथं रेखांकन हिलाः न्हूगु दयेकूगु दु ।

म्हिगः सेनां पत्रकार सम्मेलन यानाः मन्त्रिपरिषदं स्वीकृत जुइधुंकूगु डीपीआरय् ख्वनाया लिसें महादेवटारं निसें लनेडाँडा क्षेत्रया रेखांकन हिउगु खँया जानकारी बिउगु खः । एसियाली विकास बैंक (एडीबी)या सम्भाव्यता अध्ययन व प्रारम्भिक डिजाइन कथं सिकाली देगः लिसें १३ रोपनी जग्गा म्हासे जुइ धासें ख्वनाया स्थानीय वासिन्दां विरोध यायेवं उकिया विकल्प बारे बहस न्ह्याःगु खः ।

स्थानीय जनप्रतिनिधिं बुंग लिकसं लाःगु फर्सिडोलयात जिरो प्वाइन्ट दयेकेगु सहमति याःगु खः । तर सेनां स्थानीय वासिन्दाया माग कथं सिकाली देगः व कुदेशयात संरक्षण यानाः न्हूगु रेखांकन याःगु खः । न्हूगु रेखांकन कथं ख्वनाया ७८ रोपनी व फर्सिडोलया ३० रोपनी जग्गा अधिग्रहण यायेमालीगु खँ धाःगु दु ।

उकथं हे कान्ति लोकपथलिसे लँ स्वाइगु जूगुलिं महादेवटारंनिसें लनेडाँडा क्षेत्रय् नं रेखांकन हिलाबिउगु दु। अन १.३७ किलोमिटर हाकःगु छोक्रेडाँडा-ठिगन-लनेडाँडा सुरुब मार्ग दयेकेगु प्रस्ताव याःगु खः । फास्ट ट्राय्कय् आः स्वंगू सुरुब दइगु जूगु दु ।

न्हूगु डीपीआर कथं फास्ट ट्राय्कया लम्बाई म्हो जूगु दु। न्हापा ७६.२ किलोमिटर जुयाच्वंगु फास्ट ट्राय्क आः ७२.५ किलोमिटर कायम जुइगु खँ नं सेनां धाःगु खः । फास्ट ट्राय्कया हाकः चीहाकः जूसां उकिया लागत धाःसा अप्वःगु खँ धाःगु दु। न्हूगु डीपीआर कथं आयोजनाया लागत मूल्य अभिवृद्धि कर सहित १ खर्ब ७५ अर्ब थ्यनीगु खँ नं सेनां धाःगु दु। न्हापा १ खर्ब १३ अर्बया लागत वयाच्वंगु खः ।