उपाकूयात धरहराया लँ चाली

‘लँ चायेकेगु सहमति न्हापा हे जूगु दु, आन्दोलन यायेम्वाः’

येँ – उपाकू वनेगु निंतिं धरहरा लागाय् लँ चालीगु खँ २२ वडाया वडाध्यक्ष चिनकाजी महर्जनं कनादीगु दु । म्हिगः ‘नेपालभाषा टाइम्स’ लिसें खँ ल्हासें वय्कलं उगु खँ धयादीगु खः । यँयाः न्ह्यःने वयाच्वंगु इलय् सम्पदाप्रेमीपिंसं उपाकू वनेगु लँ चायेकेमाः धकाः दबाब बियाच्वंगु खःसां उकिया औचित्य मदु धासें वडाध्यक्ष महर्जनं आःया धरहरा दयेके न्ह्यः हे थःपिंसं परम्परागत लँपु चायेकेमाः धकाः आन्दोलन यानागु जक मखुसें उकिया निंतिं सम्बन्धित निकायनाप सहमति समेत जुइधुंकूगु जानकारी नं बियादिल ।

धरहरा आन्दोलनया कारणं हे थः वडाध्यक्ष जूगु खँ धासें वय्कलं धरहरायात तत्कालीन मेयर केशव स्थापितं साइड वाकर्सयात बिउगु खःसा उकिया विरोधय् थःपिंसं आन्दोलन यानागु जक मखु थःगु हे पार्टीया मेयर विरुद्ध मुद्दा समेत तयागु पुलांगु खँ नं लुमंकादिल ।

धरहरा लागाय् जुइगु छुं नं सांस्कृतिक ज्याझ्वःयात लिच्वः लाइगु ज्याखँ थःपिंत स्वीकार्य जुइ मखु धासें आः धरहराया विरोधय् गुलि नं मनूत वयाच्वंगु दु उपिं धरहराया स्थानीय वासिन्दा मखुगुलिं नं विरोधया औचित्य मदुगु दावी वय्कलं यानादिल ।वय्कलं धयादी, ‘थ्व प्रधानमन्त्रीया आयोजना खः उकियात झीगु पक्षय् गुकथं हयेगु धइगु मू खँ खः ।’

वय्कलं धरहरा क्षेत्रया विकास यायेगु धइगु वया लिकसं च्वंगु बजाःया नं विकास जुइगु खः धासें धरहरा जक मखु न्हापा टक्सारं बन्द यानातःगु सी लँ चायेकेगु निंतिं नं थःपिंसं आन्दोलन यानागु खँ नं कनादिल । आः जुयाच्वंगु आन्दोलन स्थानीय जनतायात ज्या याके मबीगु कथं जुयाच्वंगु दावी यासें वय्कलं स्थानीय जनताया निंतिं थम्हं न्ह्याबलें आन्दोलन यानाच्वनागु खँ नं कनादिल ।

देय् दबूयात सम्पदाप्रेमितय् ज्ञापन
नेवाः राजनीतिक अभियानं नेवाःतय् राष्ट्रिय संस्था नेवाः देय् दबूयात छगू ज्ञापनपौ बिसें थ्वहे भदौ १९ गते जुइगु नेवाः देय् दबूया बुन्हिया ज्याझ्वलय् संस्कृति मन्त्री योगेश भट्टराईयात मूपाहांया रुपय् मसःतेत इनाप याःगु दु ।

येँया थँबहिली च्वंगु छायादेवी कम्प्लेक्स उलेज्या यायेत तत्कालीन संस्कृति मन्त्री रविन्द्र अधिकारीयात सःतातःगु खःसा अधिकारी मवःगु अवस्थाय् भट्टराई लिउनेया लुखां वयाः उलेज्या याना थकूगु जूगुलिं वय्कःयात ज्याझ्वलय् मसःतेत अभियानं इनाप याःगु खः ।

अभियानया नायः श्रीकृष्ण मानन्धरं बियादीगु उगु ज्ञापनपत्रय् भट्टराईयात सःतल धाःसा वय्कःयात विरोध याये मालीगु ख्याच्वः नं बियातःगु दु ।