तीनकुनेय् प्यम्हेसित स्याःम्ह ल्याय्म्हयात ज्वन

येँ (नेपालभाषा टाइम्स)- थनया तीनकुनेय् च्वंगु छगू सःमिलय् प्यम्हेसित स्याःगु द्वपनय् छम्ह ल्याय्म्हयात प्रहरीं ज्वंगु दु । प्रहरीं उम्ह ल्याय्म्हयात सार्वजनिक मयाःनिसां व हे याकःचां प्यम्हेसियां हत्या याःगु खनेदुगु धाःगु दु । उम्ह ल्याय्म्हं हे थःम्हेस्यां प्यम्हेसितं स्यानागु स्वीकार यायेधुंकूगु नं प्रहरी स्रोतं धाःगु दु ।

तीनकुनेय् च्वंगु दिव्य सःमिलय् वंगु शुक्रवाः चान्हय् प्यम्हेसिया हत्या जूगु खः । अन ज्या याइम्ह १९ दँया नवीन राई लिसें मिलय् पाः च्वनीम्ह ५५ दँया कुमार भुजेल, वया कलाः सुभद्रा व वया मां ७० सुमित्रा भुजेलया हत्या जूगु खः ।

उम्ह ल्याय्म्हं नवीन लिसे थःगु न्हापांनिसें ल्वापु दुगु व वयात स्यायेत वनाबलय् मेपिंसं नं स्यूगुलिं उमित नं स्यानाथकागु बयान बिउगु खँ सीदुगु दु ।

थ्वयां न्ह्यः प्रहरीं नवीनया दाजु दीपेन्द्र राईं हे स्याःगु आशंका याःगु खः । दीपेन्द्र राई हि भ्याःगु लं फिनाः प्रहरी चौकीइ वयाः हत्याया जानकारी बिउगु खः । तर दीपेन्द्र सःमिलय् दुहां वंगु सिसिटिभी फुटेजय् खनेदु ई स्वयां न्ह्यः उमिगु हत्या जुइधुंकूगु खँ प्रहरीं धाःगु दु ।