सिँख्वंमू बहालय् लछियंकं नामसंगीति

येँ – येँया मरु त्वालय् कुमारिछेँनापं च्वंगु श्रीखण्डतरुमुल महाविहार अर्थात सिख्वंमू बहाः धर्म व संस्कृतिजक मखु नेपाःया आपालं इतिहास समेत सुलाच्वंगु छगू महत्वपूर्ण बहाःखः । गुंला शुरु जुलकि येँदेय्या नेवाः बौद्धत अप्वःथें यानाः स्वयम्भूइ गुंलाधर्म माने याःवनीगु चलन दु ।

तर सिख्वंमू बहालं धाःसा वंगु निदँ न्ह्यवंनिसें छगू न्हूगु चलन शुरु याःगु दु, थःगु हे बहाःया क्वाःपाःद्यः न्ह्यःने च्वनाः नामसंगीति पाठ यायेगु। सुथय् ७ बजे जुलकि विहार सर्वसंघया जःदुजःपिं बहालय् सिँख्वंमू बहालय् लछियंकं नामसंगीति थ्यंकः वयेधुंकी । अले करिब डेढ घन्टा नामसंगीति सहितया तुतः पाठ याइ ।

‘लछि दत थ्व पाठ न्ह्याकागु । पारु कुन्हु थ्व क्वचाइ ।’ थुगु पाठ ज्याझ्वःया संयोजक संघरत्न शाक्यं कनादिल ।

विहार सञ्चालन एवं संरक्षण समितिया नायःलिसें राजगुर्जु मञ्जुश्रीरत्न वज्राचार्ययाकथं विहारया सर्वसंघ दुजः १५०० म्हति दु। थ्व धइगु येँदेय्या फुक्क विहारत मध्ये हे दकलय् अप्वः खः ।

थन पाठ यायेगु लागिं न्हिं सछिनिसें सत्याम्हतक दुजःत वयेगु यानाच्वंगु दु। विहारया दुजःत फुक्क हे थौंकन्हय् विहार त्वःताः तातापाक च्वं वनेधुंकल । तर थ्व पाठ यायेगु ज्यां उमित हानं न्हिंन्हिं नापलायेगु ह्वःताः नं चूलाकाबिउगु दु ।

न्हापा न्हापा थज्याःगु तुतः मिस्तय्सं पाठ याये मजिउ धाइगु। तर आः अथे धायेगु चलन मंत । मिसापिं जःपिंसं नं थन तुतः ब्वनेगु शुरु याःगु करिब १५ दँ ति दत । थन विहारया मिसापिं जक दुजःत मुनाः ‘मय्जु संघ’ नं गठन याना तःगु दु ।

संघया नायः मीना शाक्ययाकथं मिसापिं दुजःत विहारया थीथी ज्याय् समावेश यानायंकेगु ज्या मय्जु संघं यानाच्वंगु दु।  विहारय् हरेक शनिवाः व पुन्हिपतिकं नामसंगीति पाठ यायेगु ज्या नं निरन्तर जुयाच्वंगु दु। थ्व पुर्खां हे चले यानाथकूगु ज्या खः ।थ्व ज्या आःतकं न्ह्यानाच्वंगु व गुंला लछि नं थपे यानाः पाठ यायेगु ज्या न्ह्याकागु खँ समितिया सचिव गौतममान शाक्यं कनादिल ।

व्यवस्थापनया ज्याय् ग्वाहालि याना च्वनादीम्ह दुजः हेमरत्न वज्राचार्यया कथं विदाया इलय् आपालं मस्त नं थुकी सहभागी जू वः, थुकिं मस्तय्त थःगु संस्कृतिया ज्ञानबीगु लिसें नैतिक शिक्षा नं प्रदानयाइ ।

सम्बन्धित बुखँ

LEAVE YOUR COMMENTS