थुगुसी यँयाः मन्यायेकीगु

यःसिं थनेगु, खः सालेगु लगायतया फुक्कं गतिविधि दिकेगु निर्णय

येँ (नेपालभाषा टाइम्स) – थुगुसीया यँयाः नखः नं कोरोनाया महामारीं प्रभावित जुइगु जूगु दु। येँ देय्या तःजिगु जात्रा कथं कयातःगु यँयाःया सुरु जूगु प्रतीक कथं थनीगु यःसिं हे थुगुसी मथनीगु जुइवं यँयाःया मेमेगु जात्रा नं ठप्प जुइगु जूगु दु ।

यँयाः जात्रा व्यवस्थापन समिति, गुथि संस्थान व येँ जिल्ला प्रशासन ज्याकू दथुइ जात्रा संचालन यायेगु सम्बन्धय् च्वंगु मुँज्यां यँयाःया निंतिं यःसिं मथनेगुलिसें कुमारि खः सालेगु, दागिं पिथनेगु, बौमत वनेगु लगायतया सकतां जात्रा मयायेगु क्वःछिउगु खः । गुथि संस्थान व येँ जिल्ला प्रशासनलिसे खँल्हाबल्हा लिपा हाकनं समितियापिं जक बिस्कं बैठक च्वनाः जात्रा दिकेगु क्वःछिउगु खः । कोरोना संक्रमणया विषम परिस्थितियात ध्यानय् तयाः उकथं निर्णय यायेमाःगु खँ इन्द्रजात्रा व्यवस्थापन समितिया नायः गौतमरत्न शाक्यं ‘नेपालभाषा टाइम्स’यात
जानकारी बियादिल ।

‘यँयाः जात्रा संचालन यायेगु कि मयायेगु धयागु बारे नेपाल सरकार, जिल्ला प्रशासन ज्याकू, येँ महानगरपालिकानाप ताःई न्ह्यवंनिसें समन्वय यानाच्वनागु खः’ वय्कलं धयादिल, ‘तर थ्व सम्बन्धय् आधिकारिक रुपं निर्णय याये मफयाच्वंगु खः । व्यवस्थापन समिति, जिल्ला प्रशासन ज्याकू, गुथि संस्थानया प्रतिनिधिसहितया लिपांगु बैठकं जात्रा दिकेगु निर्णय जुल ।’

जात्रा यायेगु जूसा थःपिं तयार दुगु, तर जात्रा गुकथं यायेगु धयागु बारे जात्रा संचालनया निंतिं यायेमाःगु तयारीया १६ गू बुँदाया सुझाव थःपिंसं प्रमुख जिल्ला अधिकारीयात न्ह्यब्वयागु व उकी सरकारं ग्वाहालि यात धाःसा जात्रा यायेत तयार दुगु जानकारी बियागु खँ नं वय्कलं कनादिल ।

राष्ट्र प्रमुखया हे उपस्थिति दयेमाःगु जात्रा संचालन बारे ठोस निर्णय मजुयाच्वंगु अवस्थाय् प्रमुख जिल्ला अधिकारीं जात्रा संचालन यायेगु सम्भावना हे मदु धकाः धायेवं वंगु शुक्रवाः समितिया मुँज्या च्वनाः यःसिं थनेगु, कुमारि सालेगु लगायत सकतां गतिविधि मयायेगु निर्णय याःगु खः ।

यःसिं महइगु जूसां नं यँयाःया इलय् पिदनीगु थीथी द्यःया जात्रा व मेमेगु यायेमाःगु परम्परागत गतिविधि दक्वं द्यः छेँय् हे च्वनाः सम्पन्न यायेगु निर्णय जूगु खँ वय्कलं कनादिल ।

उखे केन्द्रीय मानन्धर संघया सचिव गजेन्द्रमान मानन्धरं मुँज्या च्वने न्ह्यः हे गुथि संस्थानं यँयाःया निंतिं यायेमाःगु विधि व साइत पिथंगुयात नं प्रमुख जिल्ला अधिकारीं रद्द याके बिउगु जानकारी बियादिल । वय्कलं गुथि संस्थानं पूर्ववत् रुपं यँयाःया साइत पिकयाः हनुमानध्वाखाय् तिके बिउगु खःसां प्रमुख जिल्ला अधिकारीं उकियात लिकायेत गुथि संस्थानयात निर्देशन बिउगु खँ ‘नेपालभाषा टाइम्स’यात कनादिल ।

गुथि संस्थानं साइत हे पिकायेधुंकूगु व व्यापाक रुपं प्रचार जुइधुंकूगु अवस्था बारे जानकारी बियागु इलय् प्रमुख जिल्ला अधिकारीं गुथि संस्थानं बदमासी ज्या याःगु धासें तत्काल उकियात लिकायेत मुँज्याय् उपस्थित गुथि संस्थानया प्रतिनिधियात निर्देशन बिउगु खँ वय्कलं कनादीगु दु ।