संरासं नेपाःया न्हूगु नक्सा मछयः

येँ (नेपालभाषा टाइम्स)/ न्यादँ न्ह्यः नेपाःया संसदं अनुमोदन याःगु नेपाःया न्हूगु नक्सायात आःतक संयुक्त राष्ट्र संघं स्वीकृति बिउगु मदुनि । २०७७ साल असारय् नेपाःया न्हूगु नक्सा संसदं अनुमोदन याःगु खःसां थुकिया जानकारी च्याला न्ह्यः जक संरासंय् छ्वःगु खः ।
नेपाः सरकारं संरासंयात न्हूगु नक्सा सहित दस्तावेज च्याला न्ह्यः तिनि छ्वःगु खः । प्रधानमन्त्री तथा मन्त्रिपरिषदया कार्यालयं संसदं पारित न्हू नक्सा सहित ‘कमन कोर डकुमेन्ट अफ नेपाल’ राष्ट्र संघयात वंगु डिसेम्बरय् बुझे याःगु खः । उगु डकुमेन्ट संयुक्त राष्ट्रसंघीय मानव अधिकार ट्रिटी बडीइ छ्वःगु खः । संयुक्त राष्ट्र संघं उगु डकुमेन्ट वंगु जनवरीइ रिसिभ याःगु नं अभिलेखं खनेदुगु खँ धाःगु दु ।
न्यादँ न्ह्यः संसदं अनुमोदन जूगु नक्सा बारे संयुक्त राष्ट्र संघ सहित थीथी अन्तर्राष्ट्रिय समुदाय व निकाययात जानकारी याकेगु निर्णय तत्कालिन सरकारं याःगु खः । तर नेपालय् ब्वलंगु थीथी राजनीतिक घटनाक्रमं यानाः उगु डकुमेन्ट छ्वयेगु ज्या लिबानाच्वंगु खः ।
नेपाःस्थित संयुक्त राष्ट्र संघया ज्याकुथिं नं आःतक नेपाःया न्हूगु नक्सा छ्लेगु ज्या याःगु मदुनि । न्हूगु नक्साया बारे नेपालं चीन व भारतयात नं जानकारी बिउगु खःसां भारत व चीनं नेपाःयात जानकारी तकं मबिसे नेपाःया न्हूगु नक्सा दुने लानाच्वंगु लिपुलेकयात थःपिनि व्यापारिक नाका दयेकेगु सहमति याःगु खः ।