पर्यटकतय‍्त विरामी दयेकाः ठगे याइपिंत कारवाहीया ख्याच्वः

येँ – हिमाल आरोहणय् वनीपिं विदेशी पर्यटकतय्त विरामी दयेकाः उद्धारया नामय् ठगे याइपिं पर्यटन व्यवसायीतय्त कडा कारवाही यायेगु ख्याच्वः बिउगु दु । पर्यटकतय‍्त विरामी दयेकाः उद्धार यानागु धकाः बीमा दावी यानाः ठगे यानाच्वंपिंसं देय‍्या हे बदनाम यानाच्वंगु धासें सरकारी छानविन कार्यदलं दोषीपिंत कडा कारवाही यायेगु खँ धाःगु खः ।

उद्धारया नामय् हेलिकप्टर निसें अस्पतालया तकया खर्च धका लखौंलख तका विदेशी बीमा कम्पनीइ दावी यानाच्वंगु खँ पिहां वयेवं सरकारं छानविन कार्यदल गठन याःगु खः । विदेशी पर्यटकत नेपाः वइबलय् बीमा याना वःगु जुइ । थथे नेपाः

चाःहिउवइपिं पर्यटकतय्त ठगे याइपिं पर्यटन व्यवसायीतय्सं नसाज्वलनय् वासः तयाः नकाः विरामी यायेगु यानाबी । अले पर्यटकत विरामी जुल धायेवं हेलिकप्टर यंकाः उद्धार यानाः अस्पताल यंकेगु याइ । अले थज्याःपिं पर्यटन व्यवसायीतय्सं हेलिकप्टर कम्पनी लिसें अस्पताल तक सेटिङ मिले यानाः अप्वः अप्वः बिल दयेकाः विदेशी बीमा कम्पनीइ दावी याइ । थज्याःगु ज्यां नेपाःया हे बदनाम जुयाच्वंगुलिं सरकारं छानविन सुरु याःगु खः ।

ताःई न्हयवनिसें पर्यटन व्यवसायी यानाच्वनादीम्ह टे«किंग एजेन्ट्स एशोसियसन अफ नेपाल टानया महासचिव आङ पेम्बा शेर्पां विदेशी पर्यटकतय्त सिइक चायेकं हे बिरामी यानाः उद्धार यायेगु नामय् कमे यायेगु प्रवृत्ति अप्वया वनाच्वंगु खँ बिबिसी लिसे खँल्हासें कनादीगु दु ।

वय्कलं धयादिल, ‘विदेशीतय् दंगु भावं प्याकेज मी । अले हिमालपाखे थहां वनाच्वंगु इलय् झारा जुइगु वासः नकाः विरामी यानाबी, अले तत्काल उद्धार यायेगु नामय् ठगे यायेगु याइ ।’

वय्कःया कथं पथप्रदर्शक निसें उद्धारया निंतिं छ्यलीगु हेलिकप्टर, अस्पताल, उद्धार एजेन्सी लिसे तक सेटिङ मिले यानाः अप्वः अप्वः ध्यबा दावी याइ । तजाःगु हिमाली थासय् विरामी जुल धायेवं हेलिकप्टरं उद्धार यायेगु बाहेक विकल्प दइमखु, अले तसकं थिके जुइगु थज्याःगु प्रक्रियायात हे ध्बया कमे यायेगु लँ दयेकाच्वंगु दु ।

वय्कलं छम्ह पर्यटकया नामय् १० लाख तकाया बीमा ध्यबा कायेगु यानाच्वंगु खँ धयादीगु दु । छगू ट्रेकिङ एजेन्सीं ला सकलें हे पर्यटक विरामी जुल धकाः उद्धार यानागु दावी याःगु व छन्हु हे झिंन्याम्ह तक उद्धार याःगु घटना पर्यटन क्षेत्रय् अझ नं चर्चा जुइगु याः ।
सरकारं गठन याःगु छानविन कार्यदलया संयोजक संस्कृति, पर्यटन व नागरिक उड्डयन मन्त्रालयया सहसचिव घनश्याम उपाध्यायं हेलिकप्टरं उद्धार यानागु, अस्पतालय् वासः याकगु धकाः न्हयाथेंज्याःगु बहाना दयेकूगु जूसां ठगे याःगु धयागु राज्यविरुद्धया अपराध खः धासें थकिया गम्भीर छानविन जुइ धयादीगु दु । कार्यदलयात वइगु असार १५ गते तकया दुने प्रतिवेदन लःल्हायेगु ई बियातःगु दु ।
पर्यटन व्यवसायीं हे पर्यटकयात विरामी दयेकाबीबलय् छखें पर्यटकया भ्रमण लक्ष्य ला पूमवनीगु हे जुल, लिसें अन्तर्राष्ट्रिय बीमा क्षेत्रय् बदनाम जुयाः नेपाः वइपिं पर्यटकतय् बीमा यायेत तकं थाकुइगु अवस्था जुयावःगु दु ।
हेलिकप्टर कम्पनी एयर डाइनेस्टिया निर्देशक श्याम कँडेलं बिबिसीयात धाःगु दु, ‘समस्यात यक्व दु, तर खँ वयाच्वं कथं तसकं तःधंगु नं मखु । थुकी राज्य भचा चलाख जुल धाःसा याकनं समाधान यायेफइ । गथेकि विमानस्थलय् थ्यनेवं विरामीया अवस्था जाँच यायेगु व कडीकडाउ यात धाःसा अनैतिक ज्या यायेगु आँट यायेफइमखुु ।