थँबहिलिइ सुचुकुचु अभियान

येँ(नेपालभाषा टाइम्स)- राजधानीया प्रमुख पर्यटकीय लागा थँबही सुचुकुचु यायेगु अभियान शुरु जूगु दु । देय्या हे प्रमुख पर्यटकीय लागा थँबहीयात सफा, स्वच्छ व पर्यटकमैत्री दयेकेगु ल्याखं थ्व अभियान न्ह्याकूगु खः ।

ठमेल पर्यटन विकास परिषद्या सक्रियताय् येँ महानगरपालिका, नेपाल प्रहरी थँबही लागा पर्यटन व्यवसायी, स्थानीय क्लब, संघसंस्थालिसें स्थानीयवासी थँबही लागा सुचुकुचु यायेगु अभियानय् लगे जूगु खः ।

‘झीगु थँबही, सफा थँबही’या नारा बियाः वंगु छुं दिं न्ह्यः थ्व थँबही सुचुकुचु यायेगु ज्या जूगु खः। अभियानया झ्वलय् थँबहीया मुख्य सतक क्षेत्र लिसें गल्ली, दुनेया चुकय् नं सुचुकुचु याःगु खः । थँबहीयात सफा व पर्यटकमैत्री दयेकेगु अभियानकथं सुचुकुचु ज्याझ्वः संचालन यानागु परिषदं जानकारी बिउगु दु ।

अभियानया समीक्षा यानाः वइगु दिनय् गुकथं न्ह्याः वनेगु व थँबहीयात अझ गुकथं सशक्त व प्रभावकारी याये फइ धइगु खँय् थँबहीया पर्यटन व्यवसायी व छेँथुवाःया सल्लाह सुझावया लिधंसाय् न्ह्याः वनेगु परिषदं धाःगु दु ।

थँबहीयात पर्यटकमैत्री यायेगु ल्याखं थीथी थासय् सीसी क्यामरा जडान यायेगु ज्या नं न्ह्याः वनाच्वंगु दु ।