थिमि नगरपालिकाय् पुस मसान्त दुने सहकारी ऐन

थिमि – मध्यपुर थिमि बचत तथा ऋण सहकारी संस्थाया झिंछक्वःगु साधारण सभां कृष्णकाजी मानन्धरया नेतृत्वय् न्हय्म्ह दुजः दुगु न्हूगु संचालक समिति नीस्वंगु दु । न्हूगु ज्यासना पुचलय् उपाध्यक्ष संजयकुमार श्रेष्ठ, सचिव सुन्दरलाल श्रेष्ठ, कोषाध्यक्ष प्रेमसुन्दर श्रेष्ठ व दुजलय् अनिल श्रेष्ठ, रमेश थुसा श्रेष्ठ व डा. उज्ज्वल जोशीयात ल्यःगु खःसा लेखा सुपरीवेक्षण समितिया संयोजकय् सुन्दर श्रेष्ठया लिसें राजकुमार नापित व कृष्णसुन्दर प्रजापति निर्वाचित जूगु दु ।

मध्यपुर थिमि नगरपालिकाया मेयर मदनसुन्दर श्रेष्ठं सहकारी ऐन २०७४यात पुस मसान्त दुने पारित यायेगु खँ कनादिल । स्थानीय स्वायत्त शासन ऐन अन्तर्गत ऐन दयेकेगु सन्दर्भय् हचुवा सहकारी ऐन स्वीकार्य जुइमखु धासें परिपक्व ऐन दयेकेगु खँ धयादिल ।
ज्याझ्वलय् न्ववानादिसें वय्कलं सहकारी लगायत विषयगत संस्था स्थानीय सरकार अन्तर्गत वःगुलिं थप व्यवस्थित यानाः न्ह्याकेमागु खँ धयादिसें थिमिइ च्वंगु फुक्क सहकारीयात नगरपालिकाय् दर्ता यायेत आह्वान यानादिल ।

अथेहे ज्याझ्वलय् न्ववासें मध्यपुर थिमि नगरपालिकाया पुलांम्ह मेयर व समाजसेवी मदनकृष्ण श्रेष्ठं बचत तथा ऋण सहकारीं नगरवासीयात साना व घरेलु व्यवसाय यायेत प्रोत्साहित याःगु दावी यानादिल । भचाभचा ध्यबा मुंकाः जीवनस्तर सुधार यायेत सहकारी संस्थातय्सं तःधंगु भूमिका म्हिताच्वंगु खँ वय्कलं धयादीगु खः ।