हस्तलिखित सफू संरक्षणया तालिम क्वचाल
येँ – थनया आशा सफूकुथिइ न्ह्यानाच्वंगु हस्तलिखित ग्रन्थया पाण्डुलिपि व ताडपत्र संरक्षण तालिम शुक्रवाः क्वचाल । तालिम न्यान्हुयंकं जूगु खः । तालिमय् आशा सफूकुथि लिसें राष्ट्रिय अभिलेखालय, केशर पुस्तकालय, राष्ट्रिय संग्रहालय, पं. योगहरिनाथ स्मृति प्रतिष्ठानया प्रतिनिधिपिंसं ब्वति काःगु खः । सहभागीपिंत सफू तयेगु भ्वंया बाकस दयेकेगु तालिम बिउगु ।
थ्व तालिम जर्मनीया ह्याम्बर्ग विश्वविद्यालयया प्राध्यापक मय्जु मिशेल बिडलं बियादीगु खः । समापन ज्याझ्वलय् सहभागीपिंत सफूकुथि गुथिया दांभरि भूषणप्रसाद श्रेष्ठं दसिपौ लःल्हानादिल । ज्याझ्वलय् प्रा. निर्मलरत्न तुलाधर लिसें ह्याम्बर्ग विश्वविद्यालयया प्रतिनिधि डा. विदुर भट्टराईं नं न्ववानादीगु खः ।
समापन न्ह्यः सुथय् नेपाःया लागिं जर्मन राजदूतावासया सांस्कृतिक सहचारी मय्जु पाउला वेर्नरं आशा सफूकुथि झायाः तालिमया निरीक्षण यानादीगु खः । वय्कःयात आशा सफूकुथि बारे नं पुस्तकालयाध्यक्ष शरद कसां जानकारी बियादिल । थ्व तालिम लिपा आः आशा सफूकुथिइ लिपा दुहां वःगु थप हस्तलिखित ग्रन्थतय्त बाकस दयेकाः संरक्षण यायेगु ज्या न्ह्याइ ।
थ्व धुंकाः थुगु ग्रन्थत स्क्यानिङ यानाः उकियात डिजिटाइज यायेगु प्रविधिया तालिम नं बीगु ज्याझ्वः दु । सपूmकुथिइ दुगु ७०२५ गू पुलांगु हस्तलिखित ग्रन्थत डिजिटाइज यायेधुंकूगु दु । लिपा हानं प्राप्त जूगु हस्तलिखित ग्रन्थत नं डिजिटाइज यायेत थ्व तालिम बीत्यंगु खः ।
LEAVE YOUR COMMENTS