ने. सं. ११४६ तछलागा नवमी - त्रिशुल जात्रा नःक्वाः दिसि

फिल्म त्वःतूसां बांलाः

छगू इलय् बलिउड फिल्म उद्योगय् चर्चा व लोकप्रियताय् दुम्ह कलाकार खः ईशा कोपिकर । थौंकन्हय् बलिउड फिल्म ख्यलं तापानाच्वंम्ह ‘खल्लास गर्ल…..’या नामं नं चर्चित ईशा हालसालय् मुम्बईया बान्द्रास्थित छगू पसलय् शपिंग यायेत वयाच्वंगु इलय् खंकूगु खः । पसलय् शपिंगया निंतिं वयाच्वंम्ह ईशायात न्हापा स्वयां आः तसकं बांलाःगु धासें वयागु चर्चा जुयाच्वंगु दु ।

सन् २०११ य् दकलय् लिपा इशा ‘राख’ नांया संकिपाय् खने दयेकः वःगु खः । थुगु हे संकिपाया छपु म्येँ ‘खल्लास ……’ धइगु म्यें गाक्कं चर्चाय् वःगु खः । फिल्मय् म्हितेगु त्वःतूगु तःदँमछि लिपा नं वयागु सुन्दरताय् खास हे छुं फरक खने मदुगु भारतीय संचारमाध्यमं न्ह्यथंगु दु ।

आकर्षक पहिरनय् शपिंगया निंतिं वयाच्वंम्ह इशायात विशेष यानाः वयागु न्हिला अर्थात मुस्कानं सकसितं आकर्षित यायेगु याः ।
सन् १९९८ य् तामिल भाय्या संकिपा ‘बाथल कविथार्ड’ नांया संकिपापाखें अभिनय यात्रा शुरु याःम्ह ईशां सन् २००० प्रदर्शनय् वःगु ‘फिजा’ नांया संकिपापाखें हिन्दीभाय्या संकिपाय् अभिनय यात्रा न्ह्याकूगु खः ।