क्यान निर्वाचनया न्हूगु तिथि क्वःछित

येँ – नेपाल क्रिकेट संघ –क्यान)या केन्द्रीय कार्यसमितिया निर्वाचन वइगु असोज १० व ११ गते जुइगु जूगु दु । थ्वयां न्ह्यव असोज ३ व ४ गते निर्वाचन यायेगु क्वःछिनातःगु खःसां राष्ट्रिय खेलकूद परिषदं थःपिंके स्वीकृत मकासे याःगु निर्वाचनयात मान्यता मबीगु धाःगु खः ।

अन्तर्राष्ट्रिय क्रिकेट परिषद (आइसिसी), क्यानया निर्वानया निंतिं गठन जूगु स्वतन्त्र समिति व राष्ट्रिय खेलकुद परिषद दथुइ मंगलवाः जूगु सहलह लिपा न्हूगु तिथि घोषणा याःगु खः । आइसिसीया कार्यवाहक अध्यक्ष इमराज ख्वाजा, रणनीतिक प्रबन्धक अमर शेखर व राखेप सदस्यसचिव रमेश सिलवाल दथुइ सोमवाः सहलह जूगु खः ।

सहमति कथं क्यानया निर्वाचत स्वतन्त्र समिति पाखें राखेपया प्रतिनिधितय् रोहवरय् जुइ । न्हूगु कार्यसमिति वयेवं आइसिसीं क्यानयात यानातःगु निलम्बन फुकुवा यायेगु निंतिं इनाप यायेगु सहमति नं जूगु दु । सोमवाः जूगु सहलहय् अक्टोवर १३ य् जुइगु आइसिसी बोर्ड बैठकय् निलम्बन फुकुवाया विषय यंकेगु बारे सहलह जूगु खः ।

निलम्बन फुकुवा जुइवं आइसिसीं नेपाली क्रिकेटया विकासय् तःधंगु ग्वाहालि यायेगु बचं बिउगु खँ राखेपया सदस्य सचिव रमेश सिलवालं धयादीगु दु । स्वदँ न्ह्यव क्यानय् सरकारी हस्तक्षेप जूगु व आर्थिक पार्दशिता मदुगु धासें आइसिसीं क्यानयात निलम्बन याःगु खः । आः राखेप व आइसिसी दथुइ जूगु वार्ताय् सहमति जूगुलिं विवाद ज्यंगु खँ धाःगु दु ।

आइसिसीं निलम्बन फुकुवा यायेगु निंतिं स्वतन्त्र समिति पाखें निर्वाचन याकेगु कथं लँपु ज्वंगु खः । थ्व कथं वंगु दँय् स्वतन्त्र समिति गठन याःगु खःसा थ्व समितिं जिल्ला क्रिकेट संघया वैधानिकता अध्ययन यानाः २० गू जिल्लाया निर्वाचन सदर याःगु खःसा १९ गू जिल्लाय् हाकनं निर्वाचन याकूगु खः । थ्व धुंकाः न्हय्गू प्रदेश समितिया निर्वाचन याकाः आः केन्द्रीय पदाधिकारीया निर्वाचन याकेत्यंगु खः ।