स्वनिगःया थीथी थासय् सीसी क्यामरा

येँ – महानगरीय प्रहरी ज्याकू येँनं स्वनिगःया थीथी थासय् सीसीटिभी क्यामरा जडान याइगु जूगु दु । महानगरीय प्रहरी ज्याकुथिं स्वनिगःया संवेदनशील क्षेत्र पहिचान जूगु थीथी ७५ गू थासय् सीसीटिभी जडान यायेगु प्रक्रिया न्ह्याकूगु खः । महानगरीय प्रहरी ज्याकू येँया प्रवक्ता पूजा सिंहं थःगु हे स्रोत व साधनयात परिचालन यानाः प्रहरीं स्वनिगःया स्वंगुलिं जिल्लाया मुख्य मुख्य थासय् सीसी क्यामरा जडान यायेत्यंगु जानकारी बियादीगु दु ।

प्रहरी परिसरया ज्याकूपाखें सीसी क्यामरा जडानया निंतिं आवश्यक थाय्या पहिचान यानाः प्रतिवेदन पेश याःगुलिं न्हापांगु चरणया ज्या न्ह्याकागु प्रवक्ता सिंहं कनादिल । वय्कःया हे संयोजकत्वय् च्वंगु बैठकं स्वनिगःया सछिगू थासय् तत्काल सीसी क्यामरा जडान यायेमाःगु खने दुगु धासें महानगरीय ट्राफिक प्रहरी महाशाखां प्रतिवेदन बिउगु खः ।

प्रतिवेदनय् तत्काल सछिगू थासय् क्यामरा जडान यायेमाःगु सुझाव बियातःगु खःसा बजेट अभावया कारणं आःयात न्हापांगु चरणय् ७५ गू थासय् जक क्यामरा जडान यायेत्यंगु खः । क्यामरा जडानया निंतिं बोलपत्र आह्वान यायेगु ज्या जुइधुंकूगु व न्हापांगु चरणय् येँया २२ गू, यलया ३९ गू व ख्वपया १४ गू थासय् थप क्यामरा जडान याइगु जूगु दु ।

थुकथं न्हापांगु चरणय् क्यामरा जडान यायेत्यंगुलिइ आकाशे ताँ (फ्लाइ ओभर) दुगु थासय् स्थायी व मेमेगु थासय् धाःसा चाःहिके जिउगु क्यामरा जडान यायेत्यंगु खः । थौंकन्हय् येँय् जक ४०२, यलय् २४ व ख्वपय् ३४ थासय् यानाः ४६० थासय् सीसी क्यामरा प्रयोग जुयाच्वंगु दु ।