खुसिबाः व चलखं देय्न्यंकंया सतक अवरुद्ध

यल –  वंगु छुं दिं न्ह्यवंनिसें मदिक्क वा वयाच्वंगुलिं यानाः देय्न्यंकंया थीथी थासय् च्वंगु सतक अवरुद्ध जूगु दु । मदिक्क वा वयाच्वंगुलिं खुसिबाः व चलः वनाः देयन्यंकंया आपालं थासय् सतक अवरुद्ध जुया बिउगु दु । वादेय्निसें लेलेतक वनेगु लँय् सवारी साधन चले जुइ फयाच्वंगु मदुसा गोदावरीनिसें फूच्वतक वनेगु लँय् नं चलः वयाः वंगु असार २८ गतेनिसें सतक अवरुद्ध जुयाच्वंगु दु ।

थुकथं हे निर्माणाधीन कान्ति लोकपथ अन्तर्गतया आपालं थासय् चलः वंगुलिं यानाः सतक अवरुद्ध जुयाच्वंगु दुसा सातदोबाटोनिसें धापाख्यःया सतक नं भासे जुयाः वये वने यायेत समस्या जुयाच्वंगु दु । निगू लेनया थुगु सतक खण्ड भासे जुइवं छगू लेन जक संचालनय् हयेत वये वने याइपिंत सहजता बीगु कुतः जुयाच्वंगु दु ।

अथे हे छम्पी–लेले सतकखण्डय् नं चलः वनाः वंगु बाःछि न्ह्यवंनिसें सतक अवरुद्ध जुयाच्वंगु दुसा थुगु सतकया छुं छुं थासय् यातायात संचालन जूगु दु । थ्व बाहेकं स्वनिगः पिने लहानया मिर्चैया–कटारी–घुर्मी सतक चलखं चुइका यंकूगुलिं पूर्णरुपं ठप्प जुयाच्वंगु दुसा तत्कालया निंतिं न्हूगु ट्र्याक चायेकेगु तयारी जुयाच्वंगु दु ।

न्हूगु ट्र्याक चायेकूसां सहज रुपं यातायात संचालन यायेत अझं छवाः स्वयां अप्वः ई काइगु सम्भावना दुगु यातायात विभागं जानकारी बिउगु दु । निर्माणाधीन पुष्पलाल राजमार्गय् नं थाय्थासय् चलः वनाः यातायात संचालनय् समस्या जुयाच्वंगु दुसा कान्ति लोकपथया आपालं थासय् वंगु चलःयात चिइकेमाःगुलिं समस्या जूगु व तत्काल अन लँ चायेकेगु सम्भावना खने दयाच्वंगु मदु ।

वा वये स्वयां न्ह्यः हे सतक अवरुद्ध जुइवं उकियात चायेकेत तयारी अवस्थाय् थःपिं वनाच्वनागु विभागया प्रवक्ता शिवहरि बास्कोटां धयादिल । थाय्थासय् प्रहरी चौकी, बस्ती, डिभिजन सतक ज्याकू लगायतया थासय् चलखं ल्हानाच्वंगु चिइकाः सतक चायेकेत आवश्यक मात्राय् सामाग्री व्यवस्थापन यानाच्वनागु जानकारी बियादिसें वय्कलं उगु हे सामग्री व उपकरणया ग्वाहालिं चलः वनाच्वंगुयात चिइकेगु ज्या जुयाच्वंगु वय्कलं धयादिल ।

खुसिबाः व चलखं सतक अवरुद्ध जुइवं तत्काल उकियात चायेके निंतिं माःगु व्यवस्था मिले यानागु भौतिक पूर्वाधार तथा यातायात मन्त्रालयया प्रवक्त राजेश्वर ज्ञवालीया दावी दु । लिसें प्राकृतिक विपदय् लानाः अवरुद्ध दक्वं सतक गथे यानाः फक्व याकनं चायेकाः यातायात संचालनय् हये फइ धइगु खँय् मन्त्रालयय् सहलह जुयाच्वंगु नं वय्कलं धयादिल ।

सम्बन्धित बुखँ

LEAVE YOUR COMMENTS