रुट पर्मिट लिपा यातायात अस्तव्यस्त

येँ – सरकारं यातायात व्यवसायीया माग कथं रुट पर्मिट बीवं स्वनिगःया यातायात व्यवस्था अस्तव्यस्त जूगु दु । व्यवसायीतय्सं माग याः कथं रुट बीगु झ्वलय् गुगुं रुटय् अप्वः गाडी दयाः सवारी जामया समस्या अप्वया वनाच्वंगु दुसा गुलिखे गाडी म्हो जुयाः यात्रुयात सास्ती जुयाच्वंगु दु ।

न्हापा न्हापा रुट बीगु ज्या यातायात व्यवसायी महासंघं याना वयाच्वंगु खःसा वंगु दँ निसें सरकारं व्यवसायी संघ खारेज यानाः यातायात व्यवस्था कार्यालयपाखें रुट बीगु निर्णय याःगु खः । यातायात व्यवस्था कार्यालयया कथं स्वनिगलय् दकलय् अप्वः सवारी साधन चक्रपथय् दु ।

चक्रपथ लिक्कं लाःगु थासय् तकं यातायात व्यवसायीतय्सं सवारी साधन चले यायेत इच्छा मक्यनाच्वंगु खँ नं कार्यालयं धाःगु दु ।
स्वनिगःया यातायातयात व्यवस्थित यायेगु निंतिं सरकारं अध्ययन नं न्ह्याकूगु दु । यातायात कार्यालयं गुगु रुटय् गुलि सवारी साधन माःधइगु अध्ययन यानाच्वंगु खः । अध्ययन लिपा सार्वजनिक साधनयात स्वंगू ब्वलय् ब्वथलाः रुट परमिट बीगु खँ कार्यालयं धाःगु दु ।