वकिलतय् आन्दोलनं डाक्टरत चिन्तित

येँ – सर्वोच्च अदालतया प्रधानन्यायाधीश चोलेन्द्र शम्शेरया राजीनामा माग यासें देय्न्यंकंया कानून व्यवसायीतय्सं यानाच्वंगु आन्दोलनं देय्या न्याय प्रणाली हे प्रभावित जुयाच्वंगु धासें नेपाल चिकित्सक संघं सकस्यां ध्यानाकर्षण याःगु दु । म्हिगः चिकित्सक संघया अध्यक्ष डा. लोचन कार्की व महासचिव डा. बद्री रिजालं छगू वक्तव्य जारी यासें कानून व्यवसायी–तय्सं आः यानाच्वंगु आन्दोलनयात शान्तिपूर्ण निकास बीगु लागिं सरकारयात नं इनाप यानातःगु दु ।

वक्तव्यय् प्रधानन्यायाधीशया राजीनामा फ्वना तःगु मदुसां न्यायमूर्तिया रूप माने यानातःम्ह व्यक्तित्व विवादय् लाःगुलिं थुकिं कानुनी राज्य व विधिया शासन धइगु मान्यताय् हे अवरोध पिहां वइगु खँ नं धयातःगु दु ।