भरतमोहन अधिकारी मंत

येँ – उपप्रधानमन्त्री लिसें सत्तारुढ पार्टी नेकपाया नेता भरतमोहन अधिकारी मंत । वय्कः ८३ दँ दुम्ह खः ।
नुगःचु व स्वँलाया ल्वचं कयाः धुमबाराहीया ह्याम्स अस्पतालय् भर्ना यानातःम्ह वय्कःया स्वास्थ्य अवस्था म्हिगः तसकं खराब जूगु खःसा पार्टीपाखें बहनी जक वय्कःया निधन जूगु घोषणा याःगु खः ।

सूत्रं धाः कथं वय्कःया शरीरया फुक्कं अंगं ज्या यायेगु त्वःतेवं ह्याम्स अस्पतालं म्हिगः सनिलया ४ बजे हे वय्कः मदुगु जानकारी बीत्यंगु खः । तर पार्टीयात नकतिनि हे जक मन्त्री रविन्द्र अधिकारी मदयाः शोक जुयाच्वंगु इलय् हानं मेगु शोक जुइगु तायेकाः उकियात लिछ्यानाः ‘म्वाके फइगु सम्भावना मदु’ धकाः जक जानकारी बीके बिउगु खः । पार्टीपाखें शुरुइ थौं सुथय् जक वय्कः मदुगु घोषणा याकेगु सल्लाह जूगु खः । तर म्हिगः बहनी च्वंगु पार्टी नेतातय्गु बैठकं म्हिगः बहनी हे मदुगु घोषणा याकेगु निर्णय यात ।

नेकपा सचिवालयया सचिव लिसें सांसद कृष्णगोपाल श्रेष्ठं बियादीगु जानकारी कथं मदुम्ह अधिकारीया शवयात थौं सुथय् ९ निसें १२ बजे तक पार्टी ज्याकुथी अन्तिम श्रद्धाञ्जलिया लागिं तयेगु क्वःजिउगु दु । वयां लिपा थौं हे अन्तिम संस्कारया लागिं पशुपति आर्यघाट यंकीगु ज्याझ्वः दु ।

भाजु भरतमोहन अधिकारीयात नेपाली राजनीतिइ अतिकं भद्र व इमानदार नेताया रुपय् कायेगु याः । नेपाःया इतिहासय् न्हापांम्ह कम्युनिष्ट प्रधानमन्त्रीया रुपय् वय्कःया दाजु मनमोहन अधिकारी सत्ताय् वःबलय् भरतमोहन अधिकारी न्हापांम्ह कम्युनिष्ट अर्थमन्त्री जुयादीगु खः । उगु इलय् वय्कलं हयादीगु ‘आफ्नो गाउँ आफै बनाउँ’ कार्यक्रम व वृद्धभत्ता अतिकं लोकंह्वाःगु खः । थुकियात थौंकन्हय् फुक्कं राजनीतिक पार्टीतय्सं नाला कायेगु यानाच्वंगु दु ।

एमालेया गुक्वःगु महाधिवेशनं ७० दँ दुपिं नेतातय्सं सक्रिय राजनीति याये दइ मखु धकाः निर्णय यायेवं भाजुं अधिकारीं न्यादँ न्ह्यः सक्रिय राजनीतिं सन्यास कायेगु घोषणा यानादीगु खः ।

ताःई तक पुष्पलाललिसे ज्या यानादीम्ह वय्कः थःगु ६० दँया राजनीतिक जीवनय् प्यकः अर्थ, छकः श्रम तथा यातायात व छकः कानून तथा संसदीय व्यवस्था मन्त्री जुयादीगु दु ।