स्कूल स्कूलय् मनपाया निरीक्षण

येँ – येँ महानगरपालिकां निजी विद्यालयया अनुगमन शुरु याःगु दु । न्हूगु शैक्षिक शुरु जुइवं न्हूगु भर्नाया निंतिं वइपिं विद्यार्थीपाखें विद्यालयं थःयत्थे भर्ना शुल्क काःगु गुनासो वयेवं मनपां अनुगमन न्ह्याकूगु खँ कामपा शिक्षा विभागया प्रमुख प्रल्हाद अर्यालं कनादिल ।

वय्कलं धयादी, ‘वैशाख महिना भर्ना यायेगु महिना खः थ्व इलय् कामपां नियमित रुपं अनुगमन यायेगु जुइ ।’
विद्यार्थी भर्ना शुल्क विद्यालयया भौतिक संरचना कथं केन्द्रित जुइगु जूगुलिं अनुगमनया झ्वलय् अनुचित ज्या जुल धाःसा थुइकेगु व उकिं नं माने मजुल धाःसा कारवाही यायेगु खँ वय्कलं कनादिल ।

कामपां वंगु असोजंनिसे विद्यालयत स्वायेगु व न्हूगुयात अनुमति बीगु विषयय् विद्यालय निरीक्षक व स्रोत व्यक्तिं अनुगमन यानाच्वंगु खःसा आः धाःसा भर्ना यायेगु ई जुयाः विशेष रुपं अनुगमन यानाच्वंगु खः । थौंकन्हय् मनपा दुने १०० सामुदायिक विद्यालय व थ्यंमथ्यं ७०० गू निजी विद्यालय सञ्चालन जुयाच्वंगु दु । उगु विद्यालयय् १ लाख ६५ हजार विद्यार्थी आखः ब्वनाच्वंगु दु ।

वंगु वैशाखय् क्वचाःगु स्थानीय तहया निर्वाचन लिपा विद्यालय स्वयेगु जिम्मेवारी मनपायात वःगु खः । थ्व दँय् न्हूगु विद्यालय चायेकेगु १२ गू निवेदन कामपाय् दर्ता जूगु दु । – रासस

सम्बन्धित बुखँ

LEAVE YOUR COMMENTS