कब्जियत – ल्वय् छता, वासः तःता
º पासिया रस त्वनादिसँ, कब्जियत मजुयावनी, लिसे स्येँ (लिभर)या विकार नं मदयावनी ।
º आमाःसि ख्वला व पुनापं बांलाक न्ह्ययाः नयाबीगु यातकि कब्जियत ला मजुयावनीगु जु हे जुल, लिसें प्वाःया मेमेगु विकार नं मदयावनी ।
º ब्याः नलकि कब्जियत जुइमखु ।
º न्ह्यागु नयेबलय् नं बांलाक न्ह्ययाः नयेगु यायेमाः । ज्यःनां बेलिया रुपय् न्ह्यागु नःसां नये धुंकाः अंजीर निगः नयाबीमाः, कब्जियत तापानावनी ।
º लुमुलुमु धाःगु दुरुया लिसें त्रिफलाचुं भ्वाःतिनादिसँ, प्वाःया थीथी विकार थुकिं नष्ट यानाबी ।
º सुथय् दनेवं छन्हु न्ह्यः बहनी सिजःया थलय् तयातःगु लः गुलिफु उलि त्वनाबीमाः, कब्जियत जुइमखु ।
º मेवा नियमित नयेगु यानाच्वन धाःसा पुलां जुइ धुंकूगु कब्जियत नं बुलुहुं लनावनी ।
º ज्यःनां, बेलि याये धुनेवं कचिगु प्याज सलादय् तयाः नयेगु यायेमाः पाचन क्रिया बल्लाकाः कब्जियत मजुइकाबीगु थ्व छगू तसकं हे पत्याः यायेबहगु घरेलु उपचार विधि खः ।
º धन्या, बेय्चि, पालु, मलय्यागु अचार दयेकाः तयातइदिसँ अले शुद्ध कस्ति ल्वाकछ्यानाः फ्ययेगु यानादिस“ । थुकिं पाचनशक्ति बल्लाकाहइ ।
º चसू, मिचः, पलःया तरकारि नयेबलय् उकिं प्वाः, सफा याइ, कब्जियत मजुइकाबी ।
º बहनी द्यने न्ह्यः बन्दाया रस त्वनेगु यानाबिलकि कब्जियत मजुयावनी ।
º जा नयेबलय् सलादया रुपय् तुसि, लैं, गाजर, गोलभ्यारा नयेगु यानादिसँ ।
º ख्वाखः (लैंया हः )यागु रस कस्ति तयाः त्वनादिसँ, गुलाफ स्वांयागु स्वांहः कस्तिलिसे न्ह्ययादिस“ ।
º तुलसी हः बहनी द्यने न्ह्यः क्वाःगु दुरुलिसे मलय् नापं तयाः कयादिस“ । सुथय् केरा यलालिसे कयादिस“, अले छोहरा क्वाःक्वाःगु दुरुलिसे न्ह्ययाः न्ह्ययाः भपादिसँ । कब्जियत मजुयावनी ।
º चाकुगु सन्तरासि खालि प्वाथय् नयाबिलकि कब्जियत नष्ट जुइ ।
LEAVE YOUR COMMENTS